Къюллул ЦIувкIратусса (1-мур) Расуллул душ Фатима Дибироваяту ттула кIулссанная чIявусса ххуйсса тIий баллай, ччянива буссияв ванищал хьунабакьин, кIул хьун ччай.
ЛичIи-личIисса жаваблувсса къуллугъирттай зий бивкIсса ххаллилсса пишакар, сакиншинначи, каялувчи хIисаврай бакъассагу, вания дакI хъинсса, мюхтажнан кумаг бан, чIарав бацIан ччисса инсанная кунмагу буслай бия ттул дустал. «Миски-гъаривнал кумагчи» учай хъярчирай, Фатимая ихтилат багьувкун. Мяйжаннугу, чIявусса лякъинтIиссар, цила чIумал пенсия бишин, му лахъ бан ва цаймигу иширттаву кумаг бувну, ванийн барчаллагьрайсса. Фатимал цилагу учай, инсаннан чIиви-хъунсса кумаг бан бюхъарча, цил дакI дигьалагай, рахIат дуккай, цув укун аьдат хьуну бура, куну.
Кабинетравун лазилавкьусса, сахIибулхайр дусса хъамитайпа буххайхту, цалчин ккаклай бунугу, нукIува кIулсса кунма бивзуна, най буна дакIнил лавсуна. ДакIнил хъиншиву ванил лажиндарайра чIалай дия.
Бувну бур Фатима 1955-ку шинал МахIачкъалалив, 1-мур ЦIувкIратусса Расуллул ва Зулайхатлул ххюва оьрчI бусса кулпатраву. Ванил ппу «Песни и танцы Дагестана» ансамбльдануву къавтIий ивкIун ур чIярусса шиннардий. Ансамбльданущал дазул кьатIаллил билаятирттайн ивну ур. Нину, оьрчIру ччаннай бавцIуну махъ, янна дуруххай фабрикалий зий диркIун дур.
МахIачкъалаллал №16 школагу къуртал бувну, Фатима бувххун бур Армавирдай юридий техникумравун, мунияр махъ – Дагъусттаннал университетрал юридий факультетрайн. ЗахIматрал ххуллу ванил байбивхьуну бур Дагъусттаннал ЗахIматрал министерствалия. Зий бивкIун бур экономистну, инспекторну, хъунмур инспекторну. Шикку зий 16 шин дурну дур ванил. Танийсса министр Парзият БахIандовал, ванил даража, бюхъу-хъит чIалай, гьан бувну бур мичча Ленинский администрациялийн собесрал хъунмурну. Шикку зий бивкIун бур 13 шинай, 2003-ку шинайн бияннин. Яла бувкIун бур МахIачкъалаллал Советский райондалул администрациялийн экономикалул отделданул хъунмурну. Оьрмулул 67 шинавун бияннин шикку зий бивкIун бур. Фатимайн тапшур байсса бивкIун бур даврил даража гьаз бан аьркинсса, жаваблувсса къуллугъру. Чув бухьурчангу, даву щирикIин дурну, гьармур низамрайн дурцуну, чIирисса чIумул дянив ххуйсса ккаккияртту чIалачIи дайсса диркIун дур. Цумур бухьурчагу къуллугърай лавайсса даражалул пишакарнан, ххаллилсса сакиншинначинан ва каялувчинан ккаллину бивкIун бур. Мунияту цуппа зузисса идарарттал хъуниминнангу бусравну, даврил уртакьтурачIагу хIурматрай бивкIун бур. Давриву ххуйсса ккаккияртту чIалачIи дуллай тIий, ва цимилагу лайкь хьуну бур ХIурматрал грамотарттан ва Барчаллагьрал чагъардан. ХьхьичIунсса пишакар хIисаврай Фатимал сурат лархъун дур ХIурматрал улттуйн. Ванил опыт ишла буллай бур социал дузалшиннарал отделлай. Фатима бур Агьалий социал буруччаврил Дагъусттаннал лайкь хьусса зузала.
БакI гьаз дансса мажал бакъасса цила къуллугърал къайгъурдацIун ва чялишсса гьурттушинна дуллай бур райондалул ва шагьрулул жяматийсса иширттавугу. ЧIярусса шиннардий бур участокрал БувчIавурттал комиссиялул председательну.
Цила кIулшивуртту, бюхъу-бажар мудангу ишла буллай бур агьалийнан мюнпатну. Ва гьуртту шай ялун нанисса ник тIайлану тарбия даву мурадрайсса личIи-личIисса мероприятиярттай.
НукIувагу кIицI лавгсса куццуй, жаваблувсса къуллугъирттай зий, ванил чIявусса инсантуран кумаг бувну бур.
Кабинетирттавусса къуллугъчитурал аьнцI-ккихь тIий, шичча тиккун, тичча кIиккун гьан буллай, азурда буллалисса инсантал, Фатимая бавну, кумаг баншиву кIулну, ванил нузах бацIайсса бивкIун бур, хIатта ванийн къабагьайми масъалартталшиврийгума.
Агьалий кьамул бан ккаккан дурсса чIун ссят ца хьуннинсса духьурчагу, ванил аьдат бувну бур отделданул зузалт, перерыв къадурну, бувкIсса инсантал цинявппа кьамул буллай. Цаягу инсан ваничIату цала мурад щаллу къавхьуну къалавгун ур. Пенсиярттал делорду ххал дурну, цуманан ци бан, ци чаран лякъин шайрив ххал байсса бивкIун бур. ЦачIава щаллу къашайсса, цайнма къабагьайсса масъала бухьурчагума, Фатимал, кIулссанначIан оьвкуну, аьркиннийн тIайла байсса бивкIун бур.
Ялун бурувгунма увчIайсса ивкIун ур ванин ахIвал-хIал кIюлама. Ккашилнал лякьагу, мякьнал кьакьаригу кIулсса, цIими ххисса инсан бур. Ца ппурттуву отделданийн пенсиялулшиврий увкIун ур ятинну ливчIсса мукьва оьрчIава хъуна-хъунама, 14 шинавусса чIаважагьил. Марххала бувсса дяркъусса кIинтнил кьини диркIун дур. Фатиман хIисав хьуну бур оьрчI кIюлану ларххун ушиву. Документругу кьамул бувну, гава ссят щаллу бан бюхълай бунува, цал ттигу учIансса кьини ккаккан дурну дур. Ва учIаннин отделданул коллективрал хIадур дурну дур мукьвагу оьрчIансса гъилисса янна-ус.
– Ца чIумал увкIунни 30 шинай заводрай зий ххуйсса харж ласлай ивкIсса адамина. ЧIалай бия кулпатрал ахIвал кIюлану бушиву. Ттун мукунми най буна бувчIайва. Документру ххилтIу бав, хъинну чIивисса пенсия бур. Аьркинмунил хъирив заводрайн гьан увну, пенсия лахъ бан документру хIадур бав. Ина вих къахьунссара, хъун бувсса пенсия лавсъсса чIумал, увкIун, каруннайн ппай тIий ия. ТачIав инсаннал канивун бурувгун бакъара, ссайнчIав тамахIну къабикIайссияв. Инсаннан кумаг бан хьурча, ттул дакI рахIат дуккай, – тIий, буслай бур Фатима.
Ва бакъарив чири. Аллагьнал ххуллийсса хъинбала-хъиншиву.
Махъсса шиннардий Фатима зий бур А. Герценнул цIанийсса Санкт-Петербургуллал педагогический институтрал МахIачкъалаливсса филиалданий юристну ва кадрардал отделданий.
Фатимал лас Дибир чIярусса шиннардий зий ивкIун ур муххал ххуллий къаралданул хъунаману. 2002-ку шинал аьпалухьхьун лавгун ур. Вайннал бур ца душ. Дианагу, нину кунма, дуккавриву, давриву итххявхсса бур. МахIачкъалаллал №13 школагу къуртал бувну, бувххун бур Санкт-Петербургуллал Граждан авиациялул академиялул юридий факультетрайн, циняв экзаменнугу лавайсса кьиматирттай дуллуну. Та ппурттуву Дагъусттанная тивун уххан увкIсса 8 инсаннава так 2-ннаща бювхъуну бур уххан. Миннавасса цагу Диана бивкIун бур. Къурталгу бувну бур ванил академия лавайсса кьиматирттай (ца мукьва, гайми циняв – ххюварду). Му къуртал бувну махъ зун бивкIун бур Судрал департаментрай судрал заседаниялул секретарьну. Шикку зий 7 шин дурну дур. Мунияр махъ дарс дихьлай бивкIун бур Правовой академиялуву. ЦIана ва зий бур Дагъусттаннал ХIукуматрачIасса Магьирлугърал ирс буруччаврил агентствалий. Ванил лас Илиясов Мурад Ппалассуннал шяравасса ур. Дианал 2 арс ур: ттаттан цIа дирзсса 7-мур классраву дуклакисса Дибир ва чIивисса Амир.
Фатимая, ванил кулпатрая гъалгъа тIутIиний, дакIнин бутан ччива 2022-ку шинал хасъсса аьралий операциялий жан дуллусса сержант Асхад ХIажиев, Къучагъшиврул ордендалул заллу, ванил уссил оьрчI ушиву. Ванала уссил Исламлулгу виричувнал кунна жан дуллуссар. Бюкьлакьисса душ ххассал бувну, цащава уккан къавхьуссар щинал ххурххуппалува.
– ОьрчIал ппу, ттул уссу МахIаммад, 4-мур классраву дуклакисса чIумала, Москавуллал циркрансса труппалувун увцуну ивкIссар тикку зузисса жула шяравучу МахIаммад Абакаровлул. АцIния ряхра шин хьуннин микку зий ивкIссар. Пагьламан лахъайссия. Ца-кIира шинал хьхьичI дунияллия лавгунни, – дакIнин утлай бур Фатима.
Фатимал бусласимуних вичIи дирхьувкун, чIалай бур кулпатравусса циняв итххявхсса, гьунар бусса, яхI, чувшиву ххисса инсантал бушиву.
Фатима цуппагу цинярдагу лайкьшивурттацIун инсаншиврул бутIа ххишалану буллусса хъамитайпа бур.
Андриана Аьбдуллаева
