Майрал 24-нний, билаятрал чIявусса школардай кунна, Лакрал райондалул школардайгу рирщунни Махъра-махъсса занг. Ва кьини ляраличIину агьамсса ва дакIний личIансса хьунни 11-мур класс къуртал буллалисса 38 ва 9-мур класс къуртал буллалисса 71 оьрчIал оьрмулуву.
Гъумучиял школа къуртал буллалими барча бан бувкIун бия райондалул бакIчи Юсуп МахIаммадов, администрациялул зузалт, идарарттал каялувчитал, учительтал ва школа къуртал буллалиминнал нину-ппу.
Юсуп МахIаммадовлул барча бунни выпускниктал.
«Ххирасса выпускниктал! ХIурмат бусса педагогтал, нину-ппу! ДакIнийхтуну барча буллай ура зу ва ххариссагу, хъювсулссагу байрандалущал. Зу, оьрмулуву ца агьамсса бутIа бивтун, бухлай буру балугъравун бивсса оьрмулувун. Школа хьуссар зун кIилчинмур къаттану, шикку тIивтIуссар зул кIулшивурттансса ххуллу, шикку хьуссар зул оьрмулуву ххарисса ва хъамакъабитансса ишру.
АцIния цава класс къуртал бувминнава 10 хъит тIий ур мусил медальданийн, 1 – арцулссаннийн. Вайннавагу 9 ур зул дянива. Мунил бусласиссар педагогический коллективрал дакIнийхтунусса захIматрая ва дуклаки оьрчIал хIарачатрая.
ЧIун анаварну най дур. ХIакьинусса жула выпускникталгу чIал къавхьуну хьунтIиссар ВУЗирдал, техникумирттал, колледжирттал студентътал. БайбишинтIиссар лахьлай цIусса пишарду. Умудрай ура пишарду лавхьхьуну махъ зу, зула аьзизсса райондалийнмай зана хьуну, шикку зий, захIмат булланссару тIий. Жула райондалий тарбия хьусса зу бакъа, щилли ппухълунная жуйнна дирсса аьдатру дуруччинтIисса.
ЧIа тIий ура зун, оьрчIрув, тIайлабацIу! Хьуннав зуяту ххаллилсса пишакартал! Зула кIулшивурттайн, бюхъулийн ва кьуватрайнгу вихну, цIусса кIулшивурттайнгу хIарачатрай бачирча, зул хьхьичI ччимур ххуллу тIитIинтIиссар. Ххуллухъин баннав зун, ххирасса выпускниктал!» – увкунни ванал.
Хъирив выпускниктал барча бунни школалул директор Соня Макьаевал:
«Бартлаганнав зул хияллу! Жу дуллусса кIулшивурттал тIурча, тIитIиннав зул оьрмулувусса хьхьичIуннайшивурттайнсса ххуллу. Вихссара зуя райондалул цIа ларай дансса, жун пахрулунсса пишакартал буккантIишиврийн».
Дуккавриву хьхьичIунсса, школалул ва райондалул оьрмулуву чялишсса гьурттушинна дуллай бивкIсса выпускниктуран дуллунни ХIурматрал грамотартту.
Выпускниктурахь ххуллухъин тIисса ихтилат бунни Райондалул кIулшивуртту дулаврил управлениялул каялувчи Муртазааьли Аьлишаевлул, вайннал цалчинсса учительтурал, классрай каялувшиву дуллалиминнал ва нитти-буттал. Вайннал чIа увкунни, ЕГЭрдугу дуллуну, цанма ччисса идарарттавун дуклан буххансса тIайлабацIу.
Жавабран выпускниктуралгу барчаллагь увкунни учительтурахь, пишкаш дунни тIутIив, дакIнин бивчунни школалул оьрмулувасса яргсса ишру.
Цалчинмур класс къуртал буллалиминнал дурккунни выпускниктуран хас дурсса назмурду. Гъумучиял ОьрчIал магьирлугърал школалул тарбиялувтуралгу цала гьунардайну чIюлу дунни Махъра-махъсса занглил байран.
Ва къуртал хьунни Махъра-махъсса занг рищаврийну, выпускниктурал «школалул вальс» щаллу даврийну, ссавнийн шарду итабакьаврийну.
Зулайхат Тахакьаева
