Июнь зурул 11-нний Украиннал аьрщарайсса хасъсса аьрали операциялий жан дуллунни Хъусращиял шяраватусса Гъазиев Алик Багьауттиннул арснал. Ва увччунни июнь зурул 18-нний буттал шяраву.
Сентябрь зуруй Аликлун хьунтIиссия оьрмулул 30 шин. АрхIал къуллугъ буллалиминнал бусаврийн бувну, чIивима сержант Аликлул жан кьурван дурну дур Запорожскаллал областьрайсса Гладкое тIисса шяравалличIасса талатавриву. Взводрал командир Алик Гъазиевлул каялувшиндарай гьужумрай нанисса минометный КамАЗ биривну бур ягинсса бита-ххитаврихьхьун.
КIицI бан багьлай бур чIивима сержант Алик Гъазиев хасъсса аьрали операция байбивхьусса цалчинсса гьантрая шийнай, цалва жагьилсса оьрмулул махъра-махъсса кьининийн талай ивкIшиву га яла цIу къизгъинний, Мариуполь ва Северодонецк шагьрурду мурахас бавриву. Багьауттиннул арс Гъазиев Алик къуллугъ буллай ивкIссар Владиккавкказрайсса Аьрасатнал аьралуннал 43057 аьрали частьраву 429 мотострелковый полкрал кIилчинмур батальондалул цалчинмур минометный взводраву, хьхьичI — хъунама наводчикну, хасъсса аьрали операция байбишавривун – взводрал каялувчину.
