Ккуллал райондалул бакIчи Шамил Рамазановлул каялувшиннаралу хьусса ирглийсса совещаниелий ххал бивгьунни аьрщи сукку хьуну, хъякрурду дагьсса чIиртту бакьин баврил, налогру ратIаврил, школарттай ремонт даврил, инвестициярдал ва туризмалул масъалартту. Совещаниелул даврий гьуртту хьунни райондалул администрациялул идарарттал каялувчитал ва шяраваллал бакIчитал.
Строительствалул ва ремонтрал масъаларттал хIакъираву Шамил Рамазановлул тIалав бунни дуллалисса давуртту лавайсса даражалий ва анаварсса мутталий къуртал даву. ЛичIиссара къулагъасрайн лавсунни, Хъювхъиял шяравасса, СВО-лий гьуртту хъанахъисса аьраличувнал кулпатрал къатрал чIиртту бакьин баврил масъала.
Налогирттал хIакъираву тIурча, щархъал администрациярттал бакIчитурайн тапшур бунни налогру датIаву низамрайн дуцин.
Туризмалул ва инвестициярттал масъалартту гьаз буллай, кIицI лавгунни райондалий физкультурно-оздоровительный центр бан пикрилий бушиву. Ва масъалалул хIакъиравусса кьутIи чирчуну дур ПМЭФ-рай. ЧIал къавхьуну дайдишинтIиссар объектрал строительство. Комплекс бантIиссар Хъусращиял шяраву. Проектрал строительство дацIлай дур 30 миллиондалун.
