Ца чулуха бургарча, лазгиял миллатрал кказитрал хъунама редактор МахIаммад Ибрагьимов Дагъусттаннал Журналистътурал союзрал председательну увчIаврива чIалай бур махъсса ппурттуву миллатрал прессалухсса къулагъас къачан хьуну душивуча, ялунгума дагъусттаннал медиалул дунияллий цIусса трендну хъанахъишиву. Вава иширал барашин дуллалиссар кIанттул медиарынокрай цIакьсса кIану бувгьусса «Этномедиахолдинг «Дагестан» хIасул дуваврилгу.

Вамур чулуха ябитарчарив, дагъусттаннал электрон СМИ-даву хьхьичIунсса сетевое издание духьувкун «Лезги газет», бувчIлай бур информация агьалиначIан биян буваврил цIусса кьяйдарду сийлуву душиву ва му ххуллий чялишну зун багьлай бушиву. Мунияту, МахIаммад Ибрагьимовлул тIайлабацIу буну, бю­хъулий дачин дуванссар тIий ура «гьанулул, мархралмур, миллатралмур» бутIул давугу, чIумул тIалавшиннардайн бувну цIусса «цифровое, конвергентное» хъаргу. Гьаннай­сса, кIирагу хъар бюхъулий цанницIун ца дакьин дурну, дюхъан дурну даву дуллан­ссар тIисса умуд бур.

Гьай-гьай, цIуну увчIусса председательнан бигьану къабикIантIиссар дагъусттаннал журналистикалул жура-журасса дунияллий гьарзат хIисавравун лавсун, гьарзат нирхиравун руртун, дакьин дурну, аякьалий ва бю­хъулий зун.
ДакI дарцIуну ура даву дю­хъан дувантIишиврий. ТIай­лабацIу баннав!