Июньдалул 15-нний МахIачкъалалив Къумукьнал театрдануву хьунни Халкьуннал инструментирттал паччахIлугърал оркестрданул 85 шинал юбилейран хас дурсса шадлугъ.

Оркестрданул коллективгу, ванил художествалул каялувчи ва хъунама режиссер Новруз Шахбазовгу барча буван сахIналийн лавхъуна ДР-лул культуралул министрнал хъиривчу Мурад ХIажиев. Ванал Дагъусттан Республикалул Культуралул министерствалул чулухасса ХIурматрал грамотартту дуллуна оркестрданул хьхьичIунсса артистътуран.

Оркестрданул коллектив барча буллалисса ихтилатраву ДР-лул Композитортурал союзрал председатель Рамазан Фаталиевлул кIицI лавгуна халкьуннал инструментирттал оркестр – ва лява-личIисса оркестр бушиву, цайминнуха къалавхьхьусса, халкьуннал музыка буручлачисса ва машгьур буллалисса, бусалардавун багьсса халкьуннал музыкантътурал каруннил сакин бувсса халкьуннал инструментру бишлашисса, вайннуву цалла дакIнил гъилишивугу дихьлай, ва оркестр республикалул достояние, хъус-ххазина хъанахъишиву, культуралул ирсирал объектру буручлачисса кунма, укунсса оркестрдугу буручлан аьркиншиву.
Гихуннай оркестрданул ккаккан дуруна концертрал хъуннасса программа. Ванил лагрулий оркестрданул щаллу бувна Дагъусттаннал композитортурал произведенияртту. Халкьуннал балай учаврил культура щиннияргу ххуйну кIулсса республикалул цIанихсса балайчитурал (Лариса ХIажиевал, Загьидат Муслимовал, Пирдаус Камаловал, Зоя Чунаевал, Аьбдулла МахIаммадмирзаевлул ва цайминнал) оркестрданул рурцусса макьаннахун увкуна ххаллилсса балайрду.