Аьрасатнал кьинилун хасну Ккуллал райондалий хьунни флешмоб. Ваний гьурттушиву дунни райондалул администрациялул ва личIи-личIисса идарарттал зузалтрал, жяматрал, оьрчIал багърал ва дуклаки оьрчIал.

Майданнив бюхттулну гьаз бувну Аьрасатнал ттугъгу, байрандалийн бавт1цири райондалул администрациялул бакIчи Шамил Рамазановлул цIания барча бувна ванал хъиривчу Анатолий Давдиевлул.

– Билаятрал кьадар хъар хъанахъиссар жуйнма гьарцаннайн – патриотшиврийн, цачIушиврийн, билаят хьхьичIунмай шаврил цIаний захI­мат бишаврийн. Халкьуннал цашиву Аьрасатнал цIакьшиврул ва билаят тIутIайх бичаврил гьануну хъанахъиссар, – увкуна ванал.

Мукунма кIицI бувна ва байрандалул цачIун буллалишиву Ватан ххирами ва билаятрал цIакьлил цIаний захIмат бихьлахьими.
– Аьрасат – му кьуват бусса паччахIлугъри, личIи-личIисса миллатру ва диннал инсантал ялапар хъанахъисса, вай цинявппагу цачIун буллалиссар кьуват бусса билаятрал ялапарлувталну цивппа бушивруцIунсса пахрулул, – ххи бувна ялагу Анатолий Давдиевлул.

Махъру лавхъуна бусравсса цаймигу инсантурал ва хъамаллурал. Культуралул къатлул зузалтрал хIадур дурну дия авадан­сса программа: Аьрасатнал ттугъ тIитIин бувну, тиха-шиха бувгьуну, сахIналийн бувккуна мюрщи оьрчIру, артистътурал увкуна балайрду, дия къавтIавуртту. Лагма-ялттусса кIантту чIюлу бувну бия ранг-рангса шардайну. Дуклаки оьрчIал дурккуна назмурду, мелданух асфальтрай дирхьуна дунияллийсса дакьаврин хас дурсса суратру.