Ларгсса нюжмаркьини МахIачкъалалив «Аьрасат – ттул тарихри» тIисса музейраву хьунни давурттах луглагимигу, давурттал щаллу буллалимигу цачIун буллалисса «Работа России. Время возможностей» тIисса щалагу Аьрасатнал вакансиярттал ярмаркалул цалчинмур бутIул даву.
[dropcap]Ш[/dropcap]икку гьуртту хьунни ДР-лул вице-премьер АьвдурахIман МахIмудов, ДР-лул захIматрал ва лябуккулул министр Мурад Казиев, ДР-лул машлул ва промышленностьрал министрнал цалчинма хъиривчу ХIажимурад Исрапилов ва цаймигу.
Ярмаркалий бия Дагъусттаннайсса 80-хъул хъунисса машлул ва промышленностьрал препдриятиярдаясса вакансияртту.
«Ва хъуннасса мероприятие даврил агьаммур мурад хъанахъиссар пишарду язи бугьан кумаг баву ва агьали давурттал дузал баву. ХIакьину шиккун бувкIсса инсантураща бюхълай бур 500-нийн бивсса вакансиярттава аьркинсса пиша язи бугьан», – увкунни АьвдурахIман МахIмудовлул.
Пишарду язи бугьаву бакъассагу, вакансиярттал ярмаркалийн бувкIминнаща бюхълай бия давурттал дузал буллалисса ишбажаранчитуращал ихтилатру бан, пишардал кIулшивуртту дулаврил идарарттай дуклакиминнансса мероприятиярдай гьуртту хьун.
Студентътал, выпускниктал ва нину-ппу, ишбажаранчитурахь цIухху-бусуртту буллай, кIул буллай бия цивппа заллусса давуртту тIитIлатIиминнансса кумагирттая.
ЦIанасса чIумал тIалавшинна дусса пишардал презентацияртту дунни республикалул кIулшивуртту дулаврил идарарттал вакилтурал.
Му бакъассагу, ярмаркалийн бувкIминнаща бюхълай бур пишардал даража гьаз бан ва цаймигу пишарду лахьхьин.
Цивппа заллусса даву тIитIин ччиминнан кумаг хIисаврай, опыт кIибавчIунни цIанасса заманнай хьхьичIунну зузисса хъанния бусласисса «Я все могу» тIисса марафондалий.
Ярмаркалул даврил лагрулий хьунни «Новая реальность в сфере занятости молодежи: от профессионального самоопределения до адаптации на рабочем месте» тIисса, дахьва даврийн бувкIсса жагьилсса пишакартуран маслихIатру буллалисса ккуркки столданул даву.
Ва ххуллухьсса вакансиярттал ярмаркалий гьуртту хьунни 3000 инсан. Вакансиярттал ярмаркалул кIилчинмур бутIул даву дайдишинтIиссар июнь зурул 23-нний.
Ярмаркалул федерал бутIун хасъсса «Работа России» тIисса порталданий кIул бан бюхъантIиссар регионнайсса давурттал дузал буллалисса хьхьичIунсса ишбажаранчитурая.
Гихуннайсса вакансиярттал ярмаркалийгу бикIантIиссар студентътуран, выпускниктуран цIанасса оьрмулуву тIалавшиннарду дусса пишарду язи бугьансса маслихIатру буллалисса экспертътал.
ДакIнийн бутанну, «Демография» миллатрал проектрал лагрулий агьали давурттал дузал буллалисса къуллугърал даву цIудуккан даву мурадрайсса проект иширайну зузи дурну душиву.
