Декабрьданул 2-нний Дагъусттаннал БакIчи Владимир Васильевлул Дагъусттаннал хъаннин дуллунни паччахIлугърал наградартту.
[dropcap]Н[/dropcap]аградартту ласун бувкIунни чIявуоьрчIру бусса ниттихъул, личIи-личIисса идарарттал паччахIлугърал давурттай зий бунува, оьрчIругу тарбия буллай, жяматийсса давугу дачин дуллалисса хъами. ПаччахIлугърал наградартту дулаву хас дурну дия уттигъанну билаятрай кIицI дурсса Ниттил кьинилун. Шиккува бусан, му кьини 1998 шиная шиннай хъанахъиссар паччахIлугърал байран.
[dropcap]Б[/dropcap]автIминнал хьхьичI махъ лахълай, Владимир Васильевлул увкунни: «Хъинну ччай бур уттигу цал зухь барча учин вай гьантрай ларгсса байран. ЦIана кьатIув дяркъу, марч, гъарал лачIлай духьурчагу, зул дакIурдиву ххаришиву дур, байрандалул тагьар дур, каниву тIутIал кацIру бур, мурччай пишру бур – мунияту жугу ххарину буру. Республикалий хьусса цинярда хъиншивуртту – ми ниттихъал дурсса давурттал хIасиллур, барчаллагь зун!».
ЦIакьсса кулпатгу ябувну, 7 арс ва 5 душ тарбия баврихлу Ниттил Орден дуллунни МахIачкъалалиясса ХIалимат Аьбдуллаеван, 10 оьрчI-бакI хъуни бувсса Дарбантлиясса Мариян ХIасанован, Дарбантуллал райондалиясса ХIабибат Байрамбекован, Гумбетуллал райондалиясса Анисат Ибрагьимован ва цайминнангу.
Дагъусттаннал БакIчинал барчаллагьрал чагъарду буллунни Каспийскаллал хъунмур библиотекалул хъунмур библиотекарь Таисия МахIаммадован, Къарабудахккантуллал райондалул 20-мур оьрчIал багърал хъунмур Айманат Абсаламован, Агъуллал райондалул Хутхуллал шяраваллил ФАП-рал хъунмур Аьшура Тляхован ва цайминнангу.
