Аьрщи цIу дуклакисса, тIабиаьт чантI тIутIисса интнил кьинирдай цинярдагу жула лакрал щархъаву лахъа-хъунну кIицI дувай аьдатравун дагьсса Хъарас щаврил байран. Ва кьини шяраваллал аргъ дирзун дикIай. ЛичIи-личIисса шагьрурдай ялапар хъанахъисса шяраваллил жямат батIай цала ватандалийн.

БучIай байран ккаккан тиха-шихасса хъамалгу. Апрельданул 13-нний Хъурдаккаврил байран хьунни Ххюлуссуннал шяраву. Хъарас щунни дукIу кьуру лавсун бивкIсса МахIаммадкарин ва Сиражуттин Кимпаевхъал.
Ххюлуссуннал аьдат дур кьуру ца-ца тухумрахьхьун булайсса. Байран хъун дан, хъарас щилащиминнал чIарав бацIан бувкIун бия щалагу Кимпахъал тухум, вайннал дустал, гьалмахтал. Шяравусса банкетру бай залдануву тIивтIусса авадансса ссупралухун бавтIун бия щарнил жямат.

Ва байрандалий ляличIисса тирхханну дикIай оьрчIан. Вай ссавур духларгун ялугьлан бикIай бяст-ччаллаву гьуртту хьуну бахшишру ласун. Цукунсса хъурдаккаврил байранни барта дакъасса. Мигу чIярусса дурну дия. Шяраваллил хъаннил хIарачат бувну бия цала усттаршиву ккаккан дан, цаннаяр ца ялтту буккан.
Балгусса балчаннущал, гъайтIала хьхьичIну, шяраваллил жямат бувккунни къурув. Щунни хъарас, дунни баргъ-гъарагъи дакьиннав, барачатсса, буллугъсса шин хьуннав тIисса дуаьрду. Гьаз бунни дукьрахIанттил кьуртти. Хъирив хьунни спортрал бяст-ччал. ХьхьичIунсса кIанттурду бувгьуминнан дуллунни бахшишру. Байрандалул сий хъиннура гьаз дунни Гъумучиял Магьирлугърал къатлул зузалтрал хIадур дурсса тяхъасса программалул. Ва кьинилун хасну Ххюлуссуннал шяраваллихасса балай увкунни Кимпаева Нурижатлул.

ЯлунчIин хъарас щун кьуру лавсунни Мусаннип Исяевлул.