МахIачкъалалив, Дагъусттаннал социал фондрал къатравусса Хъунмур никирал инсантурал центрданий (Центр общения старшего поколения) хьунни Ххувшаврил байрандалун хас дурсса шадлугърал мероприятие.
Ванил сакиншинначитал бия Зарема Абсаламовал каялувшиннаралусса «Своих не бросаем» суккушинна ва Аьбдулла Макьсудовлул каялувшиннаралусса «Гармония» ансамбль. Мероприятиялий гьуртту хьунни Пенсионертурал союзрал, аьралий комиссариатрал, Ветерантурал советрал, Чичултрал союзрал ва жяматийсса организациярттал вакилтал. Шиккун оьвкуну бия хасъсса аьралий операциялий жанну дуллусса къучагътурал ниттихъайн ва щахъаннийн. Залдануву ккаккиялун дирхьуну дия хасъсса аьралий операция нанисса кIанттурдайн гьан дан шиккура щашлашисса маскировочный къертту. КIицI лаган, шиккусса «арцул волонтертал» хъунмурчIин оьрмулул шинну ларгсса инсантал бур. Вайннал хIадур дурну дия ва кьинисса байрандалул программагу. Волонтертал ва хасъсса аьралий операциялий жанну дуллуминнал гъан-маччами барча буллалисса ва миннахь барчаллагь тIисса ихтилатру бунни Зарема Абсаламовал, «Сила матерей» тIисса жяматийсса ккуранналул каялувчи Сефижат МахIаммадрасуловал, Аьрасатнал Пенсионертурал союзрал хъунаманал хъиривчу, Дагъусттаннал Пенсионертурал союзрал хъунама АьбдурахIман МахIаммадовлул ва м.ц. Волонтертурал увкунни жула халкьуннан нукIува ххира хьусса аьралий балайрду, бувккунни шеърирду.
Мероприятиялул лагрулий чялишсса волонтертуран Пенсионертурал союзрал чулуха буллунни Барчаллагьрал чагъарду, Ветерантурал советрал чулуха – юбилейрал медальлу. Бахшишру лайкь дурминнавух бия Бархъаллал шяравасса Ххамис Кьурбанова, ГьунчIукьатIатусса Саида Къушиева ва Гъумучасса Ххадижат ХIусниева.
Ччарча къертту щашлай, ччарча янна-ка дурухлай, ччарчагу гуманитар кумаг батIлай вайннал хъуннасса, багьа бищун къашайсса даву дуллай бур къинттуллух аьралуннан кумагран.
Андриана Аьбдуллаева
