Майрал 27-нний ЦIуссалакрал райондалий агьалий кьамул бунни ДР-лул миллатрал политикалул ва диннал иширттал министр Энрик Муслимовлул. Хьунабакьаврий гьуртту хьунни ЦIуссалакрал райондалул хъунама МаматIи ХIамзатов ва ванал хъиривчутал.

Министрнал цалчин ихтилат бунни райондалул имам Мансур Хаваевлущал. Шикку гьаз бунни ихтияр дакъанма буллалисса мизитирттаясса, школардай оьрчIру тарбия бавриясса, Муфтиятрал тIимунийн къабукIлакIисса цаппара мизитирттаясса, наркоманиялиясса ва цаймигу тIулдакъашивурттая оьрчIру буруччавриясса ихтилатру.
МаматIи ХIамзатовлул бувчIин бунни, хIакьинусса кьини райондалий буллалисса мизитру, ихтияр дусса документру дузал буванцIа, бацIан бувшиву.
Министрнал кIицI лавгу­нни властьрал органну диндалул ва жяматийсса идарарттащал хIала-гьурттуну ва бавкьуну зун аьркиншиву. Мизитру баврил масъаларттугу райондалул жяматрай бивхьуну, миннащал цалийн бувкIун буллан аьркиншиву.

Вай бакъассагу, Энрик Муслимовлул ххал бивгьунни ЦIуссалакрал райондалул социал-экономикалул масъаларттугу.ВаначIан бувкIсса инсантурал мурадру бия къатта-къушлил дузалшиндарал, даврийн кьамул баврил, инфраструктура къулай даврил ва цаймигу масъаларттал хIакъиравусса.
Гьамиящиял школалул директор ПатIимат Надырова бувкIун бия чил билаятрая бувкIсса инсантал школалийн аьдат баврил кумаграл хIакъираву.
ХIакьину Гьамиящиял школалий дуклай буссар Палестиннава бувкIсса 59 оьрчI. Вайннан оьрус маз къакIулшиврийн бувну, школалул программа лахьхьин захIмат хъанай бусса бур.
Министрнал кIицI лавгунни, ва масъала кIулшивуртту дулаврил идарарттащал цачIуну ххал бигьин аьркиншиву.
Энрик Муслимовлул цачIанма бувкIсса агьалинал масъалартту лавсунни аякьалийн ва ца­ппарассаннул хIакъираву кка­ккан дунни анаварсса мутталий дузал бансса чIун ва бувсу­нни ми дузал баврил ялув цува ацIантIишиву.