Майрал 9-нний Дагъусттаннал Экономикалул министерствалул зузалтрал кIицI лавгунни «Военно-полевая кухня» тIисса, Ххувшаву ларсун 81 шин шаврин хас дурсса акция.
Шикку гьуртту хьунни Аьрасатнал Виричу Загьид Загьидов, «Ястреб-Каспий» СОБР-данул хасъсса подразделениялул зузалт, вайннал кулпатру, оьрчIру ва хасъсса аьралий операциялул гьурттучитал.
Хъун дяъвилул цIараву къучагъну талай бивкIсса вирттал дакIнин бичлачисса мажлис байбивхьуна Экономикалул министерствалул хIаятравусса Аьрасатнал Виричу МахIаммад НурбахIандовлул гьайкалдануцI тIутIив дишаврия ва минутIрайсса пахъ багьаврия.
Шиккува кIиц лаган, Экономикалул министерствалул «Военно-полевая кухня» акция гьарица шинал лахъа-хъунсса даражалий кIицI лагайссар. Министерствалул хIаятраву акциялул гьурттучитал ца ссупралух щябивкIун, дакIнин бичлай бия къучагъну талай бивкIми.
Ва кьинисса мажлис бачин бувну ия Экономикалул министерствалий дуллалисса цинярдагу патриот зумунусса мероприятиярттай чялишну гьурттушинна дайсса Загьид Асмалавович.
– ДакIнийхтуну барча дуллай ура зухь Ххувшаврил байран жулва щалвагу билаятрал халкьуннан пахрулунсса, билаятрал тарихраву ляличIисса кIану бугьлагьисса кьини. Ва жунна цинявннан яла гъилимур, чаннамур, ххирамур кьинир. Жула халкьуннал цашиврул, Ватан ххирашиврул, къучагъшиврул барашиннар.
ХIакьину жува барчаллагьрай дакIнин бичлай буру дяъвилул цIараву ва къинттуллух къучагъну талай бивкIми, партизантурал кьюкьраву душманнайн данди бацIлай бивкIми, дяъви къуртал хьуну махъсса шиннардий халкьуннал хозяйство ччаннай дацIан дуллай бивкIми. Жува буржлувссару ялун нанисса никирахь жуятува арх бувцуну нанисса дяъвилул тарих хъама къабитаншиврул, къучагъну талай бивкIминнал гьунардая буслан, – увкунни Загьид Загьидовлул.
Мероприятиялул сий дурна МахIаммад НурбахIандовлул цIанийсса МахIачкъалаллал 37-мур гимназиялул ва МахIаммад-Салам Умахановлул цIанийсса МахIачкъалаллал 8-мур лицейрал дуклаки оьрчIал хIадур дурсса концертрал. Аьралий балайрду увкуна Дагъусттаннал паччахIлугърал опералул ва балетрал театрданул артистътурал Аьбдурашид Зиябуттиновлул, Елена Величкол ва Андрей Макаровлул.
Вокалданул конкурсрай хьхьичIунсса кIану бувгьусса Шахризада МахIмудовал увкуна «Матушка земля», «Верните память» тIисса патриот балайрду.
Имара Саидова
