Циванни тIар Гьухъаллакъурух чирахъру лавхъсса

«Лакрал райондалул бакI­чину инава увчIирча, ци давуртту дантIиссия?» тIисса опрос жула кказитрай буллалисса ца базилух, аьпабиву, ХIасан КIуруховлул дуллуна укунсса жаваб: «На махъаллил хьунтIиссияв Лакрал райондалул бакIчину ацIаврия,

цанчирча му къуллугъ буну тIий дурмур къачIалачIисса, барчаллагьраяр нааьна ххисса», — тIисса. Цайми-цайми буслай бия цала дантIисса давурттая. Юсуп МахIаммадов тIурча, тани жул опросраву увагу акъассия.
Амма хьунни Лакрал райондалун, Лакку билаятран мукун­сса тIайлабацIу – сайки духларгун най диркIсса рухI кIура даен дансса чув бакIрайн агьсса.

---

2007 шинайн дияннин Лак­рал райондалул тагьар ци даражалий диркIссарив хъинну чIявуссаннан кIулссар, дакI­нийссар. ХIакьинусса кIанил ла­жингу хъиннува чIявуссаннан чIалачIиссар.
Амма чан къашай соцсетирдай райондалул бакIчинай аьй-бювкьурду ляхълахъими, щялу­сса, тасттикь бакъасса затру бу­ккай чIун-чIумуй микку-тикку. Вана ттигъаннугу «Черновик» кказитрайгу рирщуну дия Ханмямма Хановлул Да­гъусттаннал прокуратуралийн буллуссар тIисса аьрзирал (Ттурция Ла­хъиривсса ххуллу бан итабавкьусса 12 млн. къурушрава харж бувссар 2 млн., лирчIми арцу чун ларг­ссар, тIисса) хIакъиравусса макьала. Макьалалул мурад чату циван най буссарив аьл­тта чIалай бухьурчагу, жу оьвчарду райондалул бакIчи Юсуп МахIаммадовлуйн, буларду суал му иширал хIакъираву.

---

— Му аьрзирал ялув райондалийн Халкьуннал фронтрал чулухасса вакилтал бувкIун, гьарца затрал хъирив лавссар. Къеппул бугьансса хIучча, багьана къалявкъукун, аьрзачи айивхьунни, гьай, цал къатрал хьхьичI ччюрк цачIун хьуну дур тIий. На дукьан аьркин­ссарив кIаналгу, цаманалгу къатрал хьхьичIсса ччюрк?

Соцсетирдай тIимуних къулагъас дулларча, Лакрал райондалийсса агьалинал хIал-ахIвалат, Гъази-Гъумучиял ва Лакку кIанттал чIалачIин ххуй даврил ххуллий дуллан аьркинссарагу цичIав дакъасса дур. Гьай, Жагьилтурал парк ссан аьркинссар тIисса затру чичлан бикIавай, кIайксса арцугу итадаркьуну, Ккуллал райондалийнсса ламу циван буллалиссар тIун бикIавай. Цимигу шин хьу­ссар ттул кIа нигьал ва хьуллил дянивсса ххуллул масъала чулийн бутан кIантту-кIанттурдайн иллай. ЩилчIав жиплува ларсун, щиячIав кьуркьуну буллай бакъархха кIа ламу, ХIукуматрал ламу бан куну ккаккан дурсса арцух буллай бур.
Укунсса хаварду сукку хьу­сса чIумал, жула лакрал бусрав­сса арс Ссапар Аьбдуллаевлул, ни­ттил айнива цахъи бавкку­сса цала кIиссагу ккаккан бувну, учай: «Бургияра, ттул канийсса ххюва кIиссурава ва ца бур бавккусса, ва тIайла бан ттуща хъанай бакъар. Инсантуравугу цинявппа тIайласса ба­къассар, ми тIайла бангу жущава къахьунтIиссар», — куну.

Ттул давриву гъалатI бакъа­ссар ягу райондалий гьарзат ххуйну дуссар куну на тачIав къаучара. Ттунма бувчIуссагу, бувчIин бувассагу гъалатIру чIявусса буссар. Зузинащар гъалатIругу итххяххайсса.
Райондалул бакIчинал къу­ллугърайн на дахьа цалчин увчIлачIисса чIумал, ттул чIарав чIявусса бусравсса инсантал бавцIуссар. КIайннал вихшалдаран лайкьну къауккарча, нава кIайннал иттав ци лажиндаращал уругантIиссара тIисса пикри ттул бакIрава тачIавгу къабуккайссар. Ттуярва хьхьичI зий бивкIсса бакIчитурал даврий гъалатIру ляхълайгу на тачIав къаивкIссара, цала биялалун, кашилун лавхьхьуну бюхъайкун зий бухьунссия. Тайннал дува-къадуваврилсса буллансса ба­къаяхха ттул бурж, ттула биялалиймур бансса бия.

Ккуллал райондалия чIявусса идарартту шихун бизан бунни тIий бикIайва. Ттул биялалий цавагу бизан къабувссар. Амма жула райондалийми бизан бан къабитав. ХIакьинусса кьини зунттал районнай чувчIав ба­къассар Россельхозбанкрал отделение.
На, бувчIавуртту дайдишиннин къаавцIуну, хIакьинува гьавияв ва къуллугърая, ттулагу, ттул командалулгу хIарачатрайну республикалий хьхьичIунсса кIанттайн дуккан дурсса район ттулла хъиривгу лайкьну дачин дансса инсан уккарча.
Райондалул бакIчинал къуллугърайн увкIсса чIумал на ттула хьхьичI бивхьусса мурадругу чIявусса буссия.

Миннува яла хьхьичIххуттаймурну бу­ссия газ буцинсса чаранну лякъаву. Му мурад къабювхъуна утти­нин бартбигьин. Му масъалалух къуллугъчитал къула­гъас дуллай бакъая. Му иширал хIа­къиравусса масъала на цала хьхьичI бивхьукун, Республикалул цIанасса БакIчи Владимир Аьбдуаьлиевич махIаттал хьуну ливчIун ия, Дагъусттаннал оьрмулул гьарцагу аралуву хьхьичIунсса кIанттурду бувгьу­сса ххаллилсса вакилтал бувк­сса Лакрал район хIакьинусса кьининин газ бакъа личIан цукун бюхъайссар тIий. ЧIал къархьуну, дартIун совещаниегу, газ буцинсса масъала программалувун бувтун, бюджет кьамул був­ссар. Гьашину мунил ялув зий байбишинтIиссар.

Ттун нара дайдирхьусса давуртту чулийн дуккан дан ччай бур нава ва къуллугърай уссаксса.
КIуллив ттуй аьйрду ля­къинсса хIарачат буллалиминнал сияхIрай ялагу ци бивкIссарив? Гъумукун бияйсса ххуллул ла­хъишиврий чирахъру лавхъун бур тIар, кIай ссан аьркин­ссар тIар, харжгу буккан буллай. Бур мукунмасса цайми-цаймигу зат­ру. Бачи тти гъалгъа тIутIи. Халкьуннал фронтрал вакилтал цивппа бия ци чинссарив къакIулну ливчIун.

КутIану учин, ттун цIими хъанай бур ттуява аьрзарду чичлачиминнай, цивппа хьхьичIун бакьлай, цайми цала ттиликIрах лабикIлай бушивугу къабувчIлай буну тIий.
Гьарца инсаннал кьацIлин къадагъа дангу къашайссар. Цибанну туну, цала аьщун цивппа хьуннав.

P.S.
Ва макьала рищун хIадур дурну махъ хавар хьунни «Фейсбукраву» Лакрал райондалул страницалий Гъумучиял бярнил лагмасса хьхьувай­сса чирахъру ва щябикIайсса кIанттурду гъавгъсса суратру. Учинмур бакъар, хIатта райондалул бакIчинащал ччала­ччими тIабиаьтрайхгу, рухI да­къасса затурдийхгу сси лахъла­хъаву Гъумук уттинингу цимилагу хьусса иш бухьурчагу. Буссияхха гъавгъун Хан-Муртазялил гьайкалданучIасса мурхьругу, кьуллалул лагмасса чапаргу. Жула ппухълуннал чувшиву ккаккан дуллай бивкIссар ватандалийн оьсса кьини дуркний, хIакьину чувшиву ккаккан дуллай бур бу­ттал аьрщаращал талай. ХIайп!

Зулайхат Тахакьаева