Июнь зурул 15-нний жула билаятрай кIицI лагайссар Медициналул зузалал кьини. Ва кьини лахъа-хъун байссар агьалинал цIуллу-сагъшиву дуруччаврил ххуллий захIмат бихьлахьими цинявппагу.Мукунминнавасса бур чIярусса шиннардий УИС-рал системалуву зузисса, ЧIяйннал шяравасса Загьидинал душ Анджелла Кьурбановагу.
Бувну бур Анджелла 1965-ку шинал МахIачкъалалив. Ванил ппу Загьиди, медициналул институт къуртал байхту, Ккуллал азарханалий зун гьан увну, кулпатран ЧIяв бизан багьну бур. Шикку марцIсса ххювардай къуртал бувну бур Анджеллал школа. Медициналул институтравун бухлахисса душнин цалчинсса шинал тIайлабацIу къавхьуну, штукатур-малярну зун лавгун бур МахIачкъалаллал Горремстройтрестрайн. Стройкалий зий ванил кIира шин дурну дур. Шикку ва хIурматрай бивкIун бур, циннагу даву дакIнил ларсъсса диркIун дур. Ххуйсса зузала хIисаврай, ванин ХIурматрал грамотагу дуллуну дур, общежитиялуву – цинмалусса къаттагу. Шикку зузисса чIумал бувчIуну бур Райондалул советрал депутатну. Мачча-гъанминнан ва строительный институтравун бувххун ччай бивкIун бур, амма Анджеллал хиял бивкIун бур хIакин хьунсса. Ва хIадур хъанай бивкIун бур Пироговлул цIанийсса Москавуллал 2-мур медициналул институтравун буххан. Ца ппурттуву Дагъусттаннал медициналул институтрал чIарах нанисса Анджеллан гиккусса баян баву ххал хьуну дур. Армиялия бувкIсса оьрчIру кьамул буллай тIий, мединститутрал хIадур бай курсирдайнсса аьрзри кьамул байсса чIун лахъи дуллалишиву чивчуну бивкIун бур. Анджеллангу шивун документру булун пикри хьуну бур. Укун, хьхьувайсса хIадур бай курсирдайнгу бувххун, дяхтта шагьрулул азарханалий санитаркану зун бивкIун бур.
1986-ку шинал бувххун бур Дагъусттаннал медициналул институтравун. Къуртал бувну бур лавайсса кьиматирттай. Ххуйну дуклай тIий Анджелла лавайсса стипендия ласлай бивкIун бур. Дуккавривугу хьхьичIунсса, жяматийсса давурттавугу чялишну гьуртту шайсса Анджелла институтраву партиялувун кьамул бувну бур. БувчIуну бур партиялул райкомрал бюроравунгу. Ца чIумал, институтраву дуклакисса ппурттуву, ва бувкIун бур Ваччавсса райондалул азарханалийн практикалий. Даврия мурахасъсса чIумал, лавсун чIиртту хIулухIайсса цIушив ва киражгу, га щалва азархана, ялтту ва вих кIяла бувну, пперха тIутIи бувну бур цила чулухасса бахшишран.
Шамилчинмур курс къуртал байхту, Республикалул 2-мур азарханалул неврологиялул отделениялий палаталул сестрану зун бувххун, 1999-ку шинайнин микку бивкIун бур. 1995-ку шинал лавайсса даражалий къуртал бувну бур неврологнал пиша куртIну лахьхьайсса ординатура.
1999-ку шиная 2013-ку шинайн бияннин Анджелла зий бур уголовно-исполнительная системалуву. БивкIун бур хъунмур инспектор-хIакинну Дагъусттаннал УФСИН-далул медициналул отделданий. Ва бур УИС-рал щалагу медициналул къуллугърал каялувчишивугу дуллай, архIала нервардал къашавайминнангу аьркинсса консультацияртту дуллай. Мукунма бивкIун бур УИС-рал медициналул отделданул ВВК-лул эксперт-неврологну. Анджелла бур цила даву ххуйну кIулсса ва лавайсса даражалий дайсса пишакар. Хъунмур комитетрал ва прокуратуралул инспектортурал ххалбигьавуртту дуллалисса чIумал, ванил даврий тачIав цичIав аьй къалякъайсса диркIун дур. Къуллугърал каялувчитурал чулуха Анджелла цимилагу лайкь хьуну бур ХIурматрал грамотарттан, Барчаллагьрал чагъардан, мукунма арцуйнусса бахшиширттан. Ванил наградарттавух дур УИС-рал медициналул къуллугърал яла лараймур наградалун ккаллисса Федор Гаазал медальгу.
2013-ку шинал Анджелла, майорнал чиндалуву отставкалийн лавгун, зун бивкIун бур УФСИН-далул 4-мур ЛИУ-лул туберкулезрал азарханалул хъунаманал хъиривчуну. ЦIанасса чIумал ва бур 5-мур медико-санитарная частьрал туберкулезрал азарханалул туберкулезрал ва гьутрурдал 1-мур отделениялул хIакин-фтизиатрну. Гьай-гьай, давугу, къашайшалтгу бигьасса бакъар. Анджеллал хъуннасса къулагъас дур дуснакь бувминнан азарханалий хасъсса медициналул кумаг баврих.
Даврил уртакьтурачIа Анджелла хIурматрай ва бусравну бур. Уттигъанну ванин Аьрасатнал ФСИН-далул чулуха дуллунни ХIурматрал грамота.
– ХIакин хьунсса кьисмат бухьунссия, на навагу Медициналул зузалал кьини бувну бура. ЗахIматсса дунугу, ттун хъинну ххирар ттула даву, – тIий бур ва.
Анджелла бур дакI хъинсса, аьчухсса, хасиятрал бавкьусса инсан. Ванил хIурмат хъунмасса бур шяраваллил жяматрачIагу. КIицI лаган, Анджеллал ппу Загьидигу ххаллилсса лор-хIакин ивкIссар. Ва Дагъусттаннал лайкь хьусса хIакинъя.
Анджелла буттал къатлуву бунийва зий аьдат хьусса бур. Мукунма ци даву дувангу хIучI къаучайсса бур ванил уссу-ссугу. Дуллалимургу вайннал цинявннал бакIуйн дуккан къадурну къаритай. ЧIиникI лавсун цулунгу, кьяркьи дяргълай, калпушру кьукьлангу нитти-буттан хьхьичIунсса кумагчи бивкIссар Анджелла. Ва цила кулпатравуминнангу хъинну ххирасса бур. Лас МахIаммадрасул Кьукниясса ур. Вайннал бур кIива оьрчI. Душ – учительница, арс – Обороналул министерствалул хIаписар.
Медициналул зузалал кьинигу, оьрмулул юбилейгу барча дуллай, чIа тIий буру Анджеллан цIуллушиву, кулпатраву нахIушиву, ххаришивуртту, дуллалимуниву тIайлабацIу.
Андриана Аьбдуллаева
