Медициналул зузалтрал байрандалул гьантрай хьхьичIунну зузиминнан наградартту, бахшишру дулай гьар шинах. ДакIнихтуну ххарира Республикалул урологиялул центрданий зузисса ттула шяравудушнил, Цалчинмур ЦIувкIратусса ХIасанова Гульнарал захIматран ххуйсса кьимат бищаврия. Дагъусттаннал ЦIуллушиву дуруччаврил министерствалул чулухасса Барчаллагьрал чагъарданун лайкь шаврия.
ЩайхахIмадлул ва Написатлул душ Гульнара, школагу къуртал бувну, дуклан бувххун бур Дагъусттаннал медициналул училищалувун. Ва къуртал байхту, зун тIайла бувккун бур МахIачкъалаливсса оьрчIал азарханалийн. Шикку зузиссаксса хIаллай Гульнара коллективрангу бусрав хьуну, оьрчIангу, нитти-буттангу ххира хьуну бур. ЗахIматну къашавайсса оьрчI Москавливн иян уван багьлагьисса ппурттуву, санавиациялул яла ххуймур медсестра хIисаврай ва тIайла бувккун бур оьрчIащал. Ца ва иширавагума чIалай бур пишакар хIисаврай ванил кьимат лахъсса бивкIшиву. Яла, Дарбантуллал райондалийн щар хьуну, тиккусса ФАП-рай зий бивкIун бур. МахIачкъалаливнмай зана шайхту, ванин маслихIат бувну бур Республикалул урологиялул центрданий операциярду бувайсса медсестрану зун.
«Ттун ххирар оьрчIру, оьрчIащалсса давугу дакIнин малхIансса дия. Амма на мудангу хирургиялувун кIункIу тIий бияв. Ва бия ттул кIану. Гьарца касмулувугу цалвамур кIану бикIайхха инсаннал, ттулва кIанттай бушиврул пикри цIакь хьуна, хирургтурал операциярду буллалиний нава чIарав ччай бушиву чIалан бикIайхтугу. Операциярду буллай, инсантал хъин буллалисса даврил биян буллалисса асарду личIиссава бия. Нава ххишалану мюнпатну чIалай бияв ва даврий. ХIакинтуращалгу зий вардиш хъанай бияв. Нагу вайннацIун бакьлай, вайгу – ттуцIун, даву канилух дуклай. Вана укун, 1997 шиная байбивхьуссара ва центрданий, хIакьинусса кьининийн лахъи лавгунна. Хъинну ххуйсса коллектив бур жул. Центрданул хъунимигу зузиминнайгу, къашайшалтрайгу хъуннасса дакIцIуцIаву дусса бур», – тIий бур Гульнара.
Ва ковидрал пандемиялул ппурттуву таний Дагъусттаннал хъунаману зузисса Владимир Васильевлул чулухасса Барчаллагьрал чагъарданунгу лайкь хьуну бур.
«ХIурматрал грамотарду, Барчаллагьрал чагъарду ттул чансса бакъар. Ххарира ХIукуматран жулва захIмат итталу бушиврия, амма яла хъунмур ххаришиву дикIай, жучIава операция бувсса инсан хьунаавкьукун, ганал зуматусса барчаллагьрал мукъурттия», – тIий бур Гульнара.
Учарухха, цIуцIи шанийн къаагьаннав, агьарчарив, цIимилул чувначIан агьаннав куну. Гульнара кунмаминначIан, гьаннайсса.
Дунияллийцири пишардаву ца яла чирилунмур, алвагьмур пиша язи бувгьусса Гульнарангу уттиния тинмайгу чIа тIий бура тIайлабацIу, цIу-цIусса ххари-хъиншивуртту!
ПатIимат Рамазанова
