Ххуллункьини МахIачкъа­лалив «Алые паруса» ресторандалуву, чIявусса агьлугу бувкIун, хъинну лайкьсса ххуттай хьунни, Лакрал райондалул бакIчинал цалчинма хъиривчуну зий ацIния мяйра шин дурсса, Къюннуев Абакар МахIаммадлул арснан оьрмулул 70 шин там шаврил юбилейрал мажлис.

Шадлугърайн бувкIун бия ванал гъан-маччами, архIал дуклай бивкIми, цачIу зий бивкIми, дустал-гьалмахтал. Усттарну юбилейрал мажлис бачин бувну ия Абакардущал ца класс­раву дуклай ивкIсса, цалагу хьхьичIунсса дус, МахIаммад Апанниев.
Жяматраву багьавай бусрав хьусса хIакьсса лаккучу ур Абакар Къюннуев. Ванахь барчаллагьрал махъру тIутIимигу чIявусса бия.
Цалчин Абакар барча уллай, ацIния мяйра шин Лакрал райондалул бакIчинал къуллугърай дурсса, Юсуп МахIаммадовлул увкуна:
– Абакар, ттул яла дакI тIайлама кумагчи ушивруцIун, яла дакI тIайлама дус-ихти­варгур. Жул дусшиву дайдирхьуссар институтругу къуртал­ бувну, Гъумукун кIиягу зун бувкIния шиннай. Оьрмулул 25 шин хьуния шинмай жу даврийгу архIал бивкIссару, оьрмулувугу архIал буссару. Шинну наниссаксса жул дусшивугу тунт хьуссар. ХIакьсса дус оьр­мулуву бакIрайн агьаву хъунмасса талихI ва тIайлабацIур. Цума-цаннангу чIа учивияв дакI тIайласса, вихшала дишинсса дус. Му бакъассагу, Абакар хъинну грамотнайсса, лавайсса даражалул пишакарди. МахIачкъалалив на «Дагалеко» ОАО-лул каялувчину зузи­сса чIумал, хъунама бухгалтерну зий уссия. ТIал дакъа цалла даву дайва. Лакрал райондалийн зун увкIукун, ацIния мяйрагу шинал манзилданий ва хьуссар ттул урчIамур кану. Хъунна­сса хъар дуссия ванай. Райондалул щала жяматрачIагу, шяраваллал бакIчитурачIагу, дустуравугу, цIа кIулминначIагу хIурмат лавайну, бусравну усс­ия. ХIурматгу, кьиматгу ванал цала дакI марцIшиврийну, тIайлашиврийну хIалал бувссар.
– Къаитаакьин ччай усси­яв­ гьак­­сса­ на Абакар МахIамма­дович ттула чIаратугу. Амма лавгунни, увххунгу ухьунссияв, ацIния мяйра шинай, бигьа бакъасса къуллугърай зий. Амма мукъуйну, маслихIатрайну ттигу ва ттул чIарав уссар. ЧIярусса шиннардий итаннав ина жул чIарав, хIурмат лавайсса Абакар МахIаммадович, – увкунни Лакрал райондалул бакIчи Зураб Куччаевлул.
Лакрал райондалул тIайла­ба­цIугу, хьхьичIу­ннай­шивурттугу, Абакар Къюннуевлул пишакар­шивруцIун, сакиншинначинал бюхъулуцIун, агьалинах вичIи дишин кIулшивруцIун бавхIуну бушиву кIицI лавгунни ДР-лул Жяматийсса Палаталул хъунаманал хъиривчу Ссапар Аьбдуллаевлул ва Халкьуннал Мажлисрал депутат Марат Илиясовлул.
Лакрал райондалул Депутатътурал Мажлисрал хъунама Явсупи ХIамзаевлул кIицI лавгуна Абакар Къюннуевлущал оьрчIния шихунай дусшиву дан нясив шаву цанмагу хъунмасса талихIран ккаллисса ишну хьушиву.
Абакар цува математик ухьурчагу, гьарца аралуву кIулшиву лахъсса даражалул инсан ушиву кIицI лаглай, МахIаммад Апанниевлул дакIнин увтуна ванал ппу, ххаллилсса филолог МахIаммад Оьмарович, Заннала ляхъан увсса педагог-тарбиячи.
– Жу цинявппагу буржлувну буссару МахIаммад Оьмаровичлуйн. Жул классрава арулуннал школа къуртал бувссар мусил медальданущал, жущал – Абакардулгу. Абакар даврий укъа­ххайссагу, нигьакъаусайссагу ва чIивинияцIава захIматрахун увтун ивкIун тIийри. Оьрмулул 7-8 шиная шинмай, ятту ария Лаккуйнмай нанисса чIумал, жу хIухчалтран кумаг буллан лагай­ссияв, ятту тIайла буккан. Гайнналгу жун ца-ца чIи булайва. Яла гъилахъан жу гай чIиру, канаки буллай, хъунигу бувну школалийн бачиннин буттахъайн тапшур байссия. ОьрчIнийва бивхьусса тарбиялул гьаннарал бакIлахъиягу ххуйсса шай­ссар. ХIакьину МахIаммад Оьма­ровичлул рухIгу ххарину духьунссар цала арснал 70 шинал шачIанттуй дурсса давурттахлу, барчаллагь учин вайксса инсантал лагма лавгун буну тIий.
Райондалул администрациялул зузалт, ца зумату кунма, кIицI лаглай бия Абакар МахIаммадович цана хIакьсса насихIатчи хьушиву.
Абакардул кулпатрал Къис­ттаманнул ссурваврал кIицI лавгуна уссу акъасса цанма ванал уссил кIану бувгьушиву, ва цала гъан-маччаминнал дянив хIурмат бюхттулсса, ххирасса ушивруцIун, щала ТIулизуннал жяматрангу бусравну ушиву.
– Абакардул ва Къисттаманнул ташу кIиннанмагу лотореялул билетну хьуссар, – увкунни Къисттаманнул ссил Анял. – Шагьрулул шартIирдай хъунма хьусса душ, зунттал кьянатшиврия нигьагу къабувсун, ччаврил хъаттирдай левххун лавгссар шяраву ялапар хъанан. Шяраваллил захIматсса оьрмулия тачIав шикаятгу къабувссар. Жу ванийн декабристка учай­ссар. Абакар куна лайкьсса лас ва оьрчIал ппу чIарав уни, чунмай гьангу буруккин цир, мяйжаннугу.
– Агарда ттула оьрмулул 70 шин там шаврил юбилейрал мажлис бан кьисмат хьуну, хIакьину шиккун бавтIсса инсантурал бачIикссавагу га мажлисрайн бучIарча, нава иял хьусса чувнан ккалли авияв, – увкуна Абакардул хъунама арснал Аьли­баглул.
– Дур укунсса калима, «ина буси вила дус цурив, на бусанна ина цу уссарав» тIисса. Ттул буттал чIарав мудангу лайкьсса арантал бур, жун арсваврангу, эбратрансса, пахрулун­сса, – увкунни чIивима арснал МахIаммадлул.
– Абакардул щалва кулпатгу буссар эбратран бишинсса. Цаппарасса шиннардил хьхьичI Абакар ва Къисттаман Къюннуевхъул лайкь хьуссар «Образцовая семья» тIисса республикалул лишандалун. Пишакаргу ххаллилсса увккунни ваная, цува зузисса къуллугърайгу бусравну ия, къуллугърая лавгун махъгу бусравну ур, – увкунни Султан ЦIаххаевлул.
– Нажагь бакъа хьунакъабакьайссар, Абакар кунма, дакIгу, жангу давриву дирхьуну зузисса инсантал, – тIий бия Абакардущал ца классраву дуклай бивкIми. Та буххарчагу, ванал кабинетраву, бухху-букку чIявушиврул къумашиву дикIайва, телефонну кьакъадагьайва. Лагма гьарзат щуращисса куннасса тагьар дикIайва. Амма ванал даингу лякъайва жух къулагъас дансса чIун. Абакардул ужагъ щала Аьрасатнавух кIама бивщусса одноклассниктуран къалану бавцIуссар.
Абакар МахIаммадовичлул цIуллушивруя ва савлугърая кьуртти гьаз буллалими цинявппагу ца зумату кунма кIицI лаглай бия Абакар МахIаммадович хьунаакьин талихI хьуминнавасса цана навагура. Ппу дунияллия лавгун, барзрувагу чIарах букканнин, аьрархху­сса ттул дакI ­аьчух дан куна, Заннал кашилийну ттул ххуллий хьунаавкьу­ссар Абакар МахIаммадович. Гания шиннай душних кунна­сса аякьа ттун мудангу Абакар МахIаммадовичлуя ва ванал кулпатрая асар шай. КIилчинмур къаттану хьуссар ттун ванал ужагъ, гьарца даврил аьрххилий Лаккуйн лавгтари, шикку ликкайссара.
Ххаллилсса хьунни мажлис, юбилярнал цалла дакIниха лавхьхьусса.
Ххарисса кьини цала чIарав бацIан бувкIминнахь барчаллагь тIий, Абакар Къюннуевлул увкуна:
– Щукрулий ура хъунасса Заннайн, нава 70 шинавун ухх­ансса цIуллушиву дулаврихлу. ЧIярусса хъус-кьини дусса инсан акъахьурчагу, нава цуксса авадансса инсан уссарав ттун хIакьину бувчIунни. Гъан-маччами, дустал, архIал зий бивкIми хIакьину ттула лагма лавгун буну тIий. Зу хIакьину ттухава бувсса хIурмат ссай лахъанссарив къакIулли. Бу­сса оьрмулий нагу зул чIарав ацIантIиссара.
Зулайхат Тахакьаева