Загьиди Феодаев – Каспийск шагьрулулгу, «Дагдизель» заводралгу гьану бивзма
Ларгсса нюжмардий Каспийскалий, Энергетикалул колледжрал актовый залдануву, хьунни «Хъиншивуртту дуллан лявхъума» («Рожденный делать добро») тIисса луттирал презентация. Ва хъанахъиссар паччахIлугърал хьхьичIунсса ишккакку, Двигательстрой (цIанасса Каспийск) шагьру ва 182-мур завод («Дагдизель») буллай бивкIминнал хьхьичIкьюкьлувасса Загьиди (Заид) Феодаевлуя МахIаммад Буттаевлул ва Юрий Коликовлул ванияр чIярусса шиннардил хьхьичI чивчусса лу.
Ва лу хьхьичIва бувккун бивкIссар чIирисса тиражрай. Тти, ГьунчIукьатIрал шяраваллил ккурандалул сипталийн бувну, цIунилгу бивщуссар.
Увну ур Загьиди июльданул 16-нний 1899-ку шинал ГьунчIукьатIрал шяраву. Ванал ппу ХIасанхIусайн муххал усттар ивкIун ур. Загьиди бакIрайва дуклай ивкIун ур буттал шяраву тIивтIусса школалий, яла – Гъази-Гъумучиял байбихьулул лаваймур школалий. 1917-ку шинал увххун ур Халкьуннал полициялул кьюкьравун. ЧIал къавхьуну вания дурну дур Гъази-Гъумучиял Аьралий-революциялул комитетрацIунсса ЯтIул гвардиялул кьюкьа.1920-ку шинал Загьиди увххун ур РКП(б)-равун. ИвкIун ур РКП(б)-рал Дагъусттаннал обкомрал орготделданул инструкторну-сакиншинначину ва РКИ-рал Дагъусттаннал областьрал контрольданул комиссиялул Лакрал округрайсса вакилну. 1923-1925-ку шиннардий Загьиди дуклай ивкIун ур Магърибуллал захIматкашнал Москавливсса Коммунистический университетраву. КIилчинмур курс бувккуну махъ ва ивтун ур РКП(б)-лул Окружкомрал агитпропотделданул хъунаману ва жаваблувсса секретарьну. Махъ ивкIун ур РКП(б)-рал Лакрал окружкомрал секретарьнугу, отделданул хъунаманугу, ВКП(б)-лул Дагъусттаннал Обкомрал орготделданул хъунаманугу. Ва къуллугърай ванал хъунмасса захIмат бивхьуну бур цалла округрай колхозру сакин давриву.
1930-1932-ку шиннардий Загьиди дуклай ивкIун ур Москавлив ВЦИК-рачIасса марксизмалул-ленинизмалул курсирдай. Вай бувккуну махъ ивтун ур ВКП(б)-лул ЦК-лучIасса культпропотделданул хъунаманал хъиривчувну. Хъунма хIал къалавгун, партиялул ЦК-рал секретарьну лавгун ур дахьва буллай байбивхьусса 182-мур заводрайн. Махъ ивтун ур партиялул райкомрал Двигательстрой поселокрайсса секретарьну. ИвкIун ур ВКП(б)-лул Обкомрал членнугу.
Двигательстрой (цIанасса Каспийск) поселок дуллай байбивхьуну, цалчинсса къатлул гьану бизлазисса чIумал, райкомрал секретарь Загьиди Феодаевлул, бавтIминнал хьхьичI махъгу лавхъун, ялун нанисса никирттайнсса оьвчаврилсса капсулагу, цала арцул портсигаргу дирхьуну дур гьанулу.
Хъинну захIматсса шартIирдай Загьиди ХIасанхIусайновичлул хъунмасса захIматрайну ва хьхьичIунсса гьурттушиндарайну 1937-ку шинал бувссар 182-мур завод («Дагдизель») ва муницIунсса соцгородок (Каспийск). Га чIумалгу, шинну ларгун махъгу чIявусса хьуссар Загьидинал цIа бусраврай зумух ласласисса, хаснува «раскулачивание» нанисса чIумал ванал ххассал бувсса заводрал зузалт.
ТIайламур ххирасса, цаламуний ацIайсса Загьидинал душманталгу чансса бакъахьунссия. 1937-ку шинал декабрьданий ва увгьуну ур, «буржуазный националистътуращал» дахIаву душиврийсса тахсиргу бивхьуну. Дуснакьраву ивкIун ур 1940-ку шинал январьданийннин. Ва чIумал, ванай тахсир бакъашивугу чIалачIи бувну, мурахасгу увну, цIунилгу кьамул увну ур ВКП(б)-рал кьюкьравун.
Махъ Загьиди лавгун ур буттал шяравун, ГьунчIукьатIув. Шикку, «ЯтIул Ттугъ» колхозрал председательнал хъиривчувну зий, шяравалугу, шяраваллил колхозгу хьхьичIуннай дуван хъинну хъунмасса захIмат бивхьуну бур. 1942-ку шинал Загьиди, партиялул Лакрал райкомрал хIукмулийн бувну, ивтун ур райземотделданул хъунаману. Ца шинавун – республикалул Ххуллул управлениялул начальникну. Шикку зий дурсса 7 шинал дянив Загьиди Феодаевлул республикалул ххуллурдал ва ламурдал тагьар хъин чулиннай даххана хьун дурну дур. Ванал каялувшиндарай бувну бур Терек ва Сулакь неххардил ялттусса, республикалул тарихраву цалчинсса ламурду.
Амма кьадарданул ванан ялагу ца кьурчIисса «кьуру бувцIуну бур» – цирив къакIулсса багьанагу ляхъан бувну, цIунилгу дуснакь увну ур, 1950-ку шиная 1960-ку шинайн ияннин.
Загьиди аьпалул хьуну ур 1968-ку шинал. Хьусса тахсир бакъана, кIийла-кIийла дуснакьрахьхьунгу агьсса, цикссагу цаймигу захIматшивуртту дурхIусса Загьиди оьсса кьадардануща лахIан уван къавхьуну бур. Ванал бивтун бур махъа нанисса никирттан эбратрансса лайкьсса оьрму.
ЦIунилгу итабавкьусса луттирайсса презентациялийсса ихтилатругу хьунни ванал оьрмулул ва захIматрал ххуллиясса, ва кунмаминнал аьпа абадлий сагъну бикIан аьркиншивриясса, ва кунмасса чиваркIуннал цIардугу жулва шагьрурдал кIичIираваллангу дизлан аьркиншивриясса, музейрдаву вайннан хас бувсса мурцIурдугу бикIан аьркиншивриясса.
Презентациялийсса ихтилатчитуравух бия: ХIажибутта ХIусайнов, Зиябуттин ХIажимирзаев, Ибрагьим Абачараев, Морис Дандамаев, Саида Къушиева, Шамил Къардашов, Алексей ХIажиев, Мадина Темирова, Нурижат Мусаева, Герман Кириленко, ХIажи МахIаммадов ва цаймигу.
Мажлис цалва балайрдайну чIюлу бувна ХIанапи Дибировлул, Диляра Надировал, Альбина Адильгареевал ва цила къавтIаврийну «Китри» балетрал школалийн заназисса чIиви балерина Мила Репкинал.
Бадрижамал Аьлиева
