Декабрьданул 5-нний щала билаятрай кIицI лагай Волонтертурал кьини. Ва кьинилун хас дурсса личIи-личIисса мероприятияртту хьунни Ккуллал райондалул щархъавусса культуралул идарарттай. ХIакьинусса кьини волонтертурал, чIунгу харж дурну, хъуни-хъунисса давуртту дуллай бур дунияллий хъанахъисса агьамсса иширттаву. Ваччиял шяравусса Культуралул центрданийгу хьунни дуклаки оьрчIру, жагьилтал ва волонтертал гьурттусса мероприятияртту.

Райондалул Культуралул ва бигьалагай центрданул каялувчи Марина Ибрагьимовал кIицI лавгунни ва кьини, жяматрал иширттал чIарах къабувккун, халкьуннан кумаг буллалисса цума-цагу инсаннал кьинину ккалли дан бучIишиву. Центрданул художествалул отделданул каялувчи Асият МахIаммадовал дунни «Дуниял дарц1усса хъинсса инсантурайри» цIанилусса, волонтертуран хасну дуклаки оьрчIал дирхьусса суратирттал выставка. Вара кьини райцентрданий дунни «Дари добро» тIисса, хасъсса аьралий операциялул гьурттучитуран посылкартту тIайла дуклакисса акциягу.

Волонтертурал кьинилун хас дурсса мероприятие хьунни ЦIущуллал шяравусса Культуралул къатравугу. Шикку дуклаки оьрчIахь «У добра нет цены» тIисса тематикалул дарс дирхьунни школалул учительница Басират МахIаммадаьлиевал.

Вихьуллал Культуралул къатраву хьунни «Твори добро во имя блага» тIисса мероприятие. Культуралул къатрал хъунмур Рукьижат ХIасан-ХIусайновал бувсунни волонтертурал даврия.

Хъювхъиял шяраваллил Магьирлугърал къатрал хъунмур Рукьижат Оьмаевал ва байбихьулул классирттал учительница Софият Кьурбановал бувккунни оьрчIахь хъинбала-хъиншивурттаясса цитатарду.
ЧIяйннал шяраваллил Магьирлугърал къатрал хъунмур СалихIат Алхасовал сипталийну хьунни «Волонтер – звучит гордо!» тIисса мероприятие.

Имара Саидова