ДР-лул экономикалул лябуккулул министр ХIажи Султановлул хьунабавкьунни Беларусьнал делегация. Ванил каялувчину бия «Беллегпром» концерналул председатель Татьяна Лугина. Хьунабакьаврий гьуртту хьунни мукунма ДР-лул промышленностьрал ва машлул министр Низам Халилов ва АьФ-лул МИД-рал вакилханалул МахIачкъалаливсса кIилчинмур секретарь Лилиана МахIаммадова.
Юрухъ аьрххилул мурадну бур Дагъусттан Республикалул ва Беларусь Республикалул дянивсса кьутIирду цIакь даву ва цачIусса проектру бартдигьаву.
ДакIнин бутанну, Дагъусттаннал делегация Беларусь Республикалийн лавгсса чIумал ДР-лул ХIукуматрал председатель Аьбдулмуслим Аьбдулмуслимов хьунаавкьуну ивкIссар Татьяна Лугинащал. Хьунабакьаврил лагрулий къулбасру дурну диркIссар Беларусьнал ва Дагъусттаннал промышленностьрал бутIри лябуккан баврил мероприятиярттал пландалий.
ХIажи Султановлущал Беларусь Республикалул делегация бувкIунни ООО «ДОФ+» предприятиялийн. 1998 шиная шинмай рынокрай зузисса производствалул площадкалий хъамал кIул хьунни МВД-лун, МЧС-ран спецназрал подразделениярттан, виваллил ва дазул къаралуннил аьралуннан усру даврил хIалкьазиялущал.
ХIакьинусса кьини фабрикалул цилва цуппа щаллу буллай бур аьркинмунил ва кумаг буллай бур цаймигу фабрикарттан. ООО «ДОФ+» бухлай бур Дагъусттаннал «Город обувщиков» тIисса «прорывной» проектрал гьурттучитуравун, мивун бухлай бур республикалул циняв хьхьичIунми предприятияртту.
Ва проектрал мурад бур региондалул уссал промышленность лядуккан даву цIусса технологияртту щурущи даврийхчил, производствартту гьарта-гьарза даврийну ва цIусса зузи кIанттурду дузал баврийну.

ХIасан Аьдилов