Майрал 25-нний «Аьрасат – ттул тарихри» тIисса тарихийсса паркраву хьунни Дагъусттан Республикалул кIулшиву дулаврил ва элмулул министр ЯхIия Бучаевлул пресс-конференция. Ва хас бувну бия паччахIлугърал итоговый аттестациялийнсса (ГИА) ва гъинттул оьрчIру бигьалагаврийнсса хIадуршиннаран.
Пресс-конференциялий гьуртту хьунни МахIачкъала шагьрулул бакIчинал хъиривмур, шагьрулул КIулшиву дулаврил управлениялул хъунмур Шаганэ Баймурзаевагу.
ЯхIия Бучаевлул бувсунни экзаменнал кампания шайссаксса тIиртIусса ва тIайласса хьунмур буллай бушиву.
– Жул мурад – коррупциялул факторду хьун къабитавур ва гьарцагу выпускникнан цасса ва тIайласса шартIру щаллу давур, – увкунни ванал.
Бувсунни ЕГЭ ва ОГЭ дуллалисса чIумалсса мюхчаншивруцIун, экзаменну дикIантIисса пунктирдацIун дархIуну дуллалимур давриягу, каникуллайн бувксса оьрчIру ххуйну бигьагулаган, чIунгу оьнна гьан къадуван гъинтнил лагерьду цукун хIадур буллай буссаривгу.
Ва дуккаврил шинал ахирданий аттестациялийн итаавкьуну ур 1301 школалул 9-ми ва 11-ми классирттал 62 азаллий 697 выпускник. ГИА давривун кIункIу бувну бур 13 азаруннийн биявайсса зузалт. ХIадур бувну бур экзаменну дуллантIисса 154 пункт – школардал базалий, 37 пункт – шаппасса, 4 пункт – УФСИН-рал идарарттай. ХIадурну бур видеосистемалулгу щаллу бувсса 3 азаллий 369 аудитория. Экзаменну дуллалисса пунктирдай бавцIуну бикIантIий бур медициналул зузалт.
ГИА дулавривусса цIушиннардаву дур тестированиялул Федерал центрданул щаллу дурсса экзаменнал давуртту дуруччаврил система.
Ва шинал экзаменну дулаврил давриву чIяру гъараллацIун дархIусса тагьарданулгу къайгъурду ххи бувну бур, бур муниципалитетру, ххуллурду левкьун, гьан-бучIан захIмат хъанахъисса.
Ва шинал гъинттулсса лагерьдай игьалагантIиссар 47 азара оьрчI. Вай хъанахъиссар, дукIумуних бурувгун, 8 азара инсан ххишаласса. Гъинтнил лагерьдал цалла даву дайдишинтIиссар июньдалул 5-нния тиннай. Зий бикIантIиссар оьрчIру бигьалагансса 373 идара: вайннува 22 – шагьрулул кьатIувсса, 351 – школардацIун тIивтIусса.
