Лакрал райондалул администрациялул актовый залдануву хьунни цIусса дуккаврил шинацIунсса кIулшиву дулаврил зузалтрал аьдатсса августовское совещание.
Ваний гьуртту хьунни райондалул бакIчи Юсуп МахIаммадов, ванал хъиривчу Явсупи ХIамзаев, КIулшиву дулаврил управлениялул каялувчи Муртазали Аьлишаев, кIулшиву дулаврил идарарттал каялувчитал, учительтал, тарбиячитал.
Юсуп МахIаммадовлул тIайлабацIу чIа увкунни кIулшиву дулаврил зузалтран цIусса дуккаврил шинаву. КIицI лавгунни райондалул оьрмулуву кIулшиву дулаву душиву ца яла агьамсса ххуттай.
«ХIурмат бусса кIулшиву дулаврил зузалт! КIулшиву дулаву райондалул оьрмулул ца агьамсса бутIар. Мунил тагьаргу дагьлагьиссар так ца педагогтурайн дакъасса, щала агьалинайн. Директортурал ва школардал коллективирттал хIарачатрайну хIакьину цинявппа школарду хIадурну буссар оьрчIру кьамул бан. Дурссар ремонтру, мюхчан бувну буссар цIу дагьаврия ва терроризмалул нигьачIаврия, бихьлай буссар видеокамерарду.
Райондалул администрациялул лявкъуссар чаранну Аьрасатнал президентнал Майский указру щаллу бансса. Финотделданул сияхIрайн бувну, ми указру щаллу хьуну бур 120,7 процентрал, классрайсса каялувшиндарахлу федерал центрданул ххи дурсса арцу хIисав дурну, школалийн гьаннинсса кIулшиву дулаврийн багьайсса – 100,8 процентрал ва ялун ххисса кIулшиву дулаврийн багьайсса – 100,2 процентрал.
Жула дуклаки оьрчIал кIулшивурттал даража хIисав бан бюхълай бур ГИА-лул хIасиллайн бувну. Гьашину 35 выпускникнава ЕГЭ-лул хIасиллайн бувну, дянивсса кIулшиву ласаврил документ лавсунни 33-ннал. ХIасиллу, ларгсса шинах бурувгун, ххуйсса дур. Ларгсса шинал кунма, гьашинугу медальлайну школа къуртал бувсса оьрчIан райондалул администрациялул чулуха барчаллагьран дуллуссар кьу-кьуазарда къуруш – мусил медаль ларсминнан ва ацI-ацIазарда къуруш – арцул медаль ларсминнан.
Школардай каялувшиву дуллалиминнан багьлай бур дуккаврил идарарттал материал-техническая база ххуй бансса чIарав бацIанми кIункIу буллан.
Жу гьашинугу гьуртту хьуру «Единая Россия» партиялул сипталийну буллалисса «Собери ребенка в школу» тIисса щалагу Аьрасатнал акциялий, мунил лагрулий цалчинмур классравун нанисса арулцIала оьрчIан ласарду дуккаврин аьркинсса кьай-кьуйлул дузалсса портфельлу. Ттула ихтилат къуртал буллай, цал ттигу барча тIий ура зухь ялун нанисса цIусса дуккаврил шин! Ва жула билаятрай нанисса хасъсса аьралий операциягу, лахъи къалавгун, къуртал хьуну, паракьатсса оьрму ялун бучIаннав тIий ура!» – увкунни Юсуп МахIаммадовлул.
Муния махъ Муртазали Аьлишаевлул гьарза-гьартану бувсунни ларгсса дуккаврил шинал хIасиллая ва цIусса дуккаврил шинаву хьхьичI бихьлахьисса мурадирттая.
«Стратегиялуву ккаккан бувсса агьамми мурадру бур совет заманнул ва Аьрасатнал школалул язими аьдатирттал гьанулий кIулшиву дулаврил система хIасул даву, цасса кIулшиву дулаврил пространство хIасул даву, педагогтурал дефицит духлаган даву, педагогтурал пишакаршиву ларай даву, хасъсса аьралий операциялий гьуртту хъанахъиминнал ва вайннал кулпатирттал чIарав бацIаву, тарбиялул даврил цасса система хIасул даву, дуккавриву захIматшиву хьунадакьлакьиминнал аьдад яларай даву.
Лакрал райондалий зий бур 15 школа, вайннува 8 — агьамсса кIулшиву дулайсса ва 7 — дянивсса кIулшиву дулайсса. Дуклай ур 654 дуклаки оьрчI. КIива идара бур школалийн гьаннинсса кIулшиву дулайсса – ца 120 оьрчIансса, цагу – 60 оьрчIансса. Шивун занай ур 150 оьрчI. КIива идара бур ялун ххисса кIулшиву дулайсса, шивун занай ур 428 оьрчI, 180 – ОьрчIал ва чIаважагьилтурал спортрал школалийн, 248 – художествардал кIулшиву ласлай.
Цинявппа идарартту хIадурну буссар цIусса дуккаврил шинайн.
2025 шин баян бувну буссар Ватан дуруччул шинан ва Буттал кIанттул цIанийсса Хъун дяъвилий Ххувшаву ларсун 80 шин шаврин. Мунил лагрулий ларгсса дуккаврил шинал дурссар тарихрайн дагьайсса, оьрчIру ва жагьилтал Ватан ххирану, вирттаврал аьпалул хIурмат буну тарбия баврил ххуллийсса тамансса мероприятияртту. Ва ххуллийсса даву дачин дантIиссар цIусса дуккаврил шинавугу. Му бакъассагу, цIусса дуккаврил шинал шадлугърал линейкарттугу хас дурну дикIантIиссар ва даталун.
ХIурмат бусса даврил уртакьтал! Доклад къуртал буллай, барча тIий ура зухь цал уттигу цIусса дуккаврил шин! Хьуннав му жунна цинявннан тIайлабацIусса!» – увкунни Муртазали Аьлишаевлул.
КIундиннал школалул учитель Абризат ХIажиевал доклад бия 6-11-ми классирттал дуклаки оьрчIру пишардайн хIадур баврийн багьайсса. ГьунчIукьатIрал школалул директорнал тарбиялул даврилсса буллалисса маслихIатчи ПатIима Хинчаловал доклад бия «Навигатор детства» тIисса проектрал лагрулий Ватан ххирану тарбия баврил агьамшиврийн багьайсса.
«Солнышко» детсадрал директор Зулайхат Макьсудовал доклад бия ттизаманнул шартIирдаву школалийн бачиннинсса кIулшиву дулаврийн багьайсса.
КIулшиву дулаврил управлениялул методист АхIмад МихитIаевлул доклад бия кIулшиву дулаврил идарартту терроризмалия ва цIу дагьаврия бурувччаврийн багьайсса.
Августовское совещание къуртал хьунни кIулшиву дулаврил хьхьичIунсса зузалтран наградартту дулаврийну.
«Аьрасатнал кIулшиву дулаврил хIурмат бусса зузала» тIисса ларайсса лишан дуллунни Багъдаева Умаматлун, ХIасанаьлиева Барижатлун, Ибрагьимова Гулян (Гъумучиял школа), Камилов Кьурбанисмяиллун (Щардал школа), Учуева Гунназлун (ШавкIуллал школа), ХанмахIаммадов Эмирдун (Карашрал школа).
ДР-лул КIулшиву дулаврил ва элмулул министерствалул чулухасса Барчаллагьрал чагъар буллунни МухIсинова Зулайхан (Уриннал школа).
ЧIярусса шиннардий бувсса захIматрахлу цаппарасса учительтуран дуллунни райондалул администрациялул чулухасса ХIурматрал грамотартту.
Зулайхат Тахакьаева
