Ларгсса нюжмардий «Дагестанская правда» кказитрал редакциялий ПаччахIлугърал Думалул VIII-мур созыврал депутат Султан ХIамзаев хьунаавкьунни журналистътуращал.
Хьунабакьаврий ххал бивгьусса масъалартту, хьусса ихтилатру бия жулла республикалул ца яла хьхьичIавамурну ва сий думурну хъанахъисса «Дагестанская правда» кказитрал давриясса, гъараллу ларчIун, къатрацIа хьуминнан ва цаймигу зараллу бивминнан кумаг бавриясса, жулва инсантурал багьу-бизулиясса, аьдатирттаясса, жулла тарбиялуцIун, культуралуцIун даркьумуниясса ва къадаркьумуниясса. Жулла республикалий цIана хъанахъимунил ва бучIантIимунил ялув дакI цIуцIисса депутатнан ва журналистътуран буса-учинмур чан бакъая.
