Июньдалул 18-нний хьунни ДР-лул 7-мур созыврал Халкьуннал Мажлисрал ахирданийсса заседание. Парламентрал председатель Заур Аскандаровлул бувсунни парламентрал 2021-2026 шиннардий дурсса давурттал хIакъираву.
Ванал тIимунийну, сессиярттай дуллай бивкIун бур «муниципал» ва «хIукуматрал» ссятру, ми хьхьичIра къадикIайсса диркIун дур.
«Президиумрал кьатIувсса заседанияртту, кIанттурдайрасса батIавуртту, муниципалитетирттай дайсса давуртту – ми гьарзат системалийн дурцуну дуссар. – Жу ялугьлан къабикIайссияв масъала цайнува цуппа дузал хьуннин, жу лагайссияв ка-кумаг аьркин хьусса кIанайн. Ми мероприятиярттал хIасиллайн бувну, биттуршиндарал властьран, муниципалитетирттан хIадур байссия давурттал хIакъиравусса маслихIатру. Ми бартбигьаврил ялув бацIаву дайссия жул депутатътурал. Муния мюнпатгу шайва.
Заур Аскандаровлул бусарийну, агьалинащалсса дахIаву хьуну дур парламентрал щала даврил гьануну.
Парламентрал спикернал гьартану бувсунни 2026 шинал март-апрельданий личIинурасса тагьарданул чIумал депутатътурал дурсса давурттая.
Заур Аскандаровлул тIимунийну, депутатътурал корпусрал дурсса давурттал агьамсса бутIану хъанай бур СВО-лул гьурттучитуран ва миннал кулпатирттан кумаг бавугу. Мобилизациялул чIумал дузал бувну бивкIун бур штаб ва «горячая линия», депутатътал лагайсса бивкIун бур СВО-лул аьралийтал бусса кIанттурдайн, миннан тIайла буккайсса бивкIун бур ихIсандарал кумаг. Халкьуннал Мажлисраву билаятрай цалчин сакин бувну бивкIун бур СВО-лул Ветерантурал ва гьурттучитурал иширттал комитет.
Парламентрал спикернал бувсунни СВО-лул гьурттучитуран ва миннал кулпатирттан кумаг баврил хIакъираву кьамул дурсса законная.
Яла парламентрал спикернал гьарзану бувсунни бюджет щаллу баврицIун ва социал иширттацIун бавхIусса масъаларттая.
«Социал харжлугъирттан диялсса арцу дикIаншиврул закондалул гьанулий сакин бувссар республикалул Луртандалул фонд. Ялапарлувтурал ахIвал лахъ баву мурадрай кьамул дурссар цаппара агьамсса законну», – увкунни парламентрал спикернал. Ванал бувсунни ятинсса оьрчIан, чIявусса оьрчI-бакI бусса кулпатирттан, инвалидтуран кумагрансса чараннал хIакъиравусса законну кьамул дурну душиву.
Заур Аскандаровлул бувсунни ялун нанисса ник тарбия даврил ва миннал дуккаврил масъаларттал хIакъиравугу. Ванал тIимунийну, кьамул дурну дур ОВЗ дусса оьрчI-бакI дуклаки буллансса шартIру дузал даврил хIакъиравусса, ГИА къадуллусса 9 класс къуртал бувминнан пишарду лахьхьин баврил хIакъиравусса, захIматрайну тарбия баврил закон ва цаймигу законну.
Парламентрал спикернал бувсунни спортрал бутIун кумаг баврил давриягу. Бувсунни ларгсса созыврал парламентраву зий бавкIшиву 75 инсанная сакин хьусса жагьилтурал парламентгу.
Муния махъ ДР-лул Халкьуннал Мажлисрал председательнал бувсунни экономикалул ва бюджетрал программированиялул масъаларттая, ДР-лул ХIукуматращал ва муниципалитетирттащал дурсса давурттая.
Заур Аскандаровлул бувсунни чIиримур ва дянивмур бизнесран кумаг баврил хIакъиравусса закондалиягу. Депутатътурал кьамул дурну дур сакиншиннардал хъуслиясса налограл ставка лагь баврил хIакъиравусса закон ва паччахIлугърал идарарттал хъуслиясса налограща тархъан баврил закон.
Парламентрал спикернал бувсунни мукунма шяраваллил хозяйствалул экологиялул, тIабиаьтрал луртанну ишла даврил хIакъиравусса законну кьамул давриягу.
ЦIанасса ппурттуву жу зий буру «Аьрасатнал Федерациялий зунттал территорияртту лядуккан даврил ва дуруччаврил хIакъираву» тIисса федерал закондалул федерал проектраха. Ва Дагъусттаннангу, билаятрал цайми территориярттангу хъинну агьамсса проектри, ванил гьаз дуллалиссар жула оьрмулул багьу-бизулул низам, тIабиаьтрал аваданшиву, стратегиялул потенциал ябаврил масъалартту», – увкунни парламентрал спикернал. Ванал бувсунни парламентрал депутатътурал бартдигьлай бушиву контрольданул давурттугу.
«Арулчинмур созыврал даву дайдишайхтура, жу гужлан дуварду жула контрольданул давурттугу, итталу дургьуну бивкIру цукун зий дуссарив законну иширайну. Парламентрал контрольданул давурттал масъалартту ххал бигьлай буссияв комитетирттал ва Президиумрал заседаниярттай», – увкунни Заур Аскандаровлул. Ванал бусаврийну, депутатътурал личIинура къулагъас дуллай бивкIун бур социал объектру баврил ва миннул капитал ремонтрал давурттах. Ххюра шинал мутталий бувну бур 111 цIусса школа ва 97 оьрчIал багъ, бакьин бувну бур 374 школа. Бувну бур 122 ФАП.
Парламентрал председательнал бувсунни парламентирттал дянив дуллай бивкIсса давурттал хIакъиравугу. Халкьуннал Мажлис чялишну гьуртту хьуну бивкIун бур республикалий дурсса циняв давурттавух.
Парламентрал спикернал 7-мур созыврал депутатътурахь барчаллагь увкунни дурсса давурттахлу. Барчаллагь увкунни жула республикалул ихтивар бувсса сенатортурахь, Госдумалул депутатътурахь, Республикалул ХIукуматрахь, ДР-лийсса федерал органнахь, кIанттул цилакаялувшиврул органнахь. Ванал мукунма барчаллагь увкунни СМИ-лул журналистътурахь парламентрал давурттая объективну бусласаврихлу.
