Апрельданул 16-21-нний Москавлий хьунни чIава спортсментурал дянивсса муай-тай спортрал Аьрасатнал Первенствалул бяст-ччаллу. Шикку гьуртту хьунни Аьрасатнал 58 региондалиясса 900-нния ливчусса спортсментал.

ЦIуссалакрал райондалия гьуртту хьусса Шихаьлихан Насибовлул 40 килорал кIушиву дусса, 14-15 шиннавусса спортсментурал дянив бувгьунни цалчинсса кIану, ванал лайкь дунни мусил медаль.
Шихаьлиханнул цалчинсса базилухь ух унни цала муттаэ. КIилчинсса базилухьгу ва ххув хьунни Пермский крайраясса спортсменнаяр, полуфиналданийгу ванал ух унни Къиримнавасса спортсмен. Финалданий Шихаьлихан ххув хьунни Севастопольлаясса спортсменнаяр.
Первенствалий хьхьичIунсса хIасиллу дурсса спортсмен хIадур увну ур ЦIуссалакрал райондалийсса ДЮСШ-рал тренер-преподаватель Идрис Камиловлул.
Вара Первенствалий чарвитул медальданун лайкь хьуну ур ЦIуссалакрал райондалийсса ТIюхчардал шяравасса МахIаммадаьрип МахIаммадов.
Первенствалий хьхьичIунсса кIанттурду бувгьусса спортсментал гьуртту хьунтIиссар сентябрь зуруй Тайландрай хьунтIисса муай-тай спортрал дунияллул чемпионатрай. ЧIа учинну спортсментуран гихунмайсса бяст-ччаллавугу тIайлабацIуртту.