Щалагу Аьрасатнаву ОьрчIал жяматийсса организацияр­ттал кьини хIисаврай кIицI лагайсса май зурул 19-нний МахIачкъалалив хьунни Ххувшаврил варистурал парад.

Ва дайдирхьунни МахIач­къала­ллал ­Хъун майданния. Шикку гьуртту хьунни 3 азаруннийн бивсса инсантал. Вайннавух бия Дагъусттаннал циняв шагьрурдаясса ва районная­сса «Цалчинминнал суккушиннарал», «Юнармиялул» активистътал, волонтертал-медиктал, студентътал-ххассалбувулт, ТОКС-рал вакилтал.
Ххувшаврил варистурал парадрай гьурттушинна дан мукунма бувкIун бия бусравсса хъамал: Аьрасатнал Виричу, «Движение Первых» суккушиннарал председатель Артур Орлов, Дагъус­ттаннал вице-премьер Муслим Телякавов, миллатрал политикалул ва диннал иширттал министр Энрик Муслимов, жагьилтурал иширттал министр Камил Саидов, МахIачкъалаллал мэр Юсуп Умавов, «Движение Первых» суккушиннарал региондалул отделениялул председатель Людмила Саидова, Дагъустта­ннал Халкьуннал Мажлисрал депутатътал, жяматийсса ишккаккулт.
Парадрал гьурттучитал барча буллалисса ихтилат бунни Артур Орловлул. Ванал кIицI лавгунни, укун бюхттулсса даражалий жула буттахъал, ттаттахъал чувшиву дакIнин дутлатиссаксса жула билаят щищачIав бух бан къахьунтIишиву.
– Зул, Ххувшаврил варистурал, кIунттихьри жула бучIантIимур бусса. ЧIярусса шинну ларгун махъ тарихрал жунма чIалачIи бунни аьмсса пикрилул, Ватандалухсса ччаврил цачIун бувсса оьрчIал ва чIава жагьилтурал бияла хъунмасса бушиву, – кIицI лавгунни цала ихтилатраву Муслим Телякавовлул.
Мероприятиялул лагрулий активистътурал буккан бунни майданнив Дагъусттаннал ва Аьрасатнал ттугъру, тIитIин дунни 45 метралул лахъи-уттасса, Буттал КIанттул цIанийсса Хъун дяъвилул ва хасъсса аьралий операциялул гьурттучитурал цIарду чирчусса, ттугълил рангирдайсса кьютIру лавчIсса «СаллатIнал карши». ЯтIулсса кьютIай чирчуну дур талатавурттаву жанну дуллуминнал цIарду, кIяламиннуй – ятIа-тIар бакъа бакъа хьуминнал­сса, някIссаннуй – дяъвилия зана хьуминналсса.
Жагьилсса активистътурал щаллу дунни Аьрасатнал ва Дагъусттаннал гимнру. «Движение Первых» суккушиннарал кьюкьравун кьамул буллалиминнай хъамаллурал бавхIунни галстукру.
Концертрал программа къуртал хьуну махъ гьурттучитал М. ХIажиевлул цIанийсса кучалийх Национал гвардиялул аьралий оркестрданухун бувкIунни Лениннул Комсомолданул паркравун. Дирхьунни тIутIив Аьраличунал гьайкалдануцI ва Славалул аллеялий.
Буттал КIанттул цIанийсса Хъунмасса дяъвилий Ххувшаву ларсун 80 шин шаврин хасну «Жагьилтал ва оьрчIру» тIисса национал проектрал лагрулий «Движение Первых» суккушиннарал региондалул отделениялул хIадур дурсса ва мероприятиялул мурад бия жагьилминнаву Ватандалухсса ччаву тарбия даву, Буттал КIанттул цIанийсса дяъвилий ва хасъсса аьралий операциялий жанну дуллусса вирттал мудан дакIний битаву.
Ххувшаврил варистурал парад хьуннин ца-кIива гьантлул хьхьичI, ванил сакиншинначитал — «Движение Первых» тIисса жяматийсса ва паччахIлугърал суккушиннарал председатель Людмила Саидова ва Суккушиннарал проектирдал каялувчи Ильдар Хусаинов «Дагестан» РИА-лий хьунабавкьунни журналистътуращал.
Людмила Саидовал кIицI лавгунни май зурул 19-нний щалагу билаятрай ОьрчIал жяматийсса организациярттал кьини кIицI лагайшиву, «Движение Первых» суккушиннагу муницIун дархIусса мероприятиярттай мудан чялишну гьуртту шайшиву, Ххувшаврил варистурал парадрай «Движение Первых» суккушиннарал кIантту-кIанттурдайсса 52-гу отделение гьуртту хьунтIишиву.
Спикертурал бусласимунийн бувну, оьрчIру школалийн къазаназисса июнь-август зурдардийгу щаллу дуллантIиссар личIи-личIисса проектру. Июнь зурул 1-нний Анжи-ареналий хьунтIиссар хъуннасса фестиваль. ХIасиллу дантIиссар «Вызов» цIанилусса спортрал фестивальданул. Мукунна хьунтIиссар «Пилоты будущего» тIисса дронну леххан даврил конкурсрал республикалул ятIап. Ялагу, шагьрулул кьатIувсса лагерьдай зунтIиссар ххюва хасъсса смена.
– Ххувшаврил варистурал парад дуллай шамилчинсса шинни. ДакIнин бутан, «Движение Первых» тIисса Аьрасатнал жяматийсса ва паччахIлугърал суккушинна сакин хьуссар 2022-ку шинал декабрь зурул 18-нний билаятрал каялувчитурал сипталий. Ва хъанахъиссар оьрчIругу, нину-ппу ва педагогталгу хIала-гьурттуну зунсса площадка,– кIицI лавгунни Людмила Саидовал.