Вай гьантрай Дагъусттаннайн бувкIсса «Ххувшаврил поезд» хьхьичIва-хьхьичI бавцIунни Къизлардай. Инсантуран хъунмасса гъира бур ва ххал бан. Къизлардая махъ «Ххувшаврил поезд» бацIантIиссар цал МахIачкъалалив, хъирив кьини – Дарбантлив.

«Ххувшаврил поезд» хъанахъиссар тарихрал ляличIисса проект, дунияллий цалчинсса нигьирттайсса музей. Ва сакин бувну бивкIссар 2020-ку шинал, Буттал кIанттул цIанийсса Хъунмасса дяъвилий Ххувшаву ларсун 75 шин шаврин хас дурсса патриот мероприятиярттал лагрулий. Шикку бур дяъвилул агьамми лахIзарду аьч буллалисса 10 вагон. Миннуву дур инсаннал чурххал лахъшиврийсса 150 скульптура, 54 видеопроект, 140-нния лирчусса мультимедиялул экранну, панеллу, чIиртту, 12 сенсорный стол. Гьарица увкIнахьхьун уллай ур аудиогид. Дяъвилул иширттая буслай бур машинист Лидиял цIания. 1941-ку шинал, дяъви байбивхьусса чIумал, ванин 19 шин диркIун дур. Поездрал экспозициялул ккаккан буллай бур Буттал кIанттул цIанийсса Хъунмасса дяъви байбишиннинсса оьрмулул, дяъвилул цалчинсса гьантрал, Брестрал къала буручлачисса чIумалсса лахIзарду, ккакан дурну дур окопру, цалчин ярагъ кIунттил бувгьусса жагьилсса саллатI. Яла захIматну асар хъанахъимур экспозиция дур «концлагерьданул» вагондалуву. Бур шикку аьралий медиктал зий бивкIсса куц ккаккан бувсса санитар вагонгу. Ленинградуллал блокадалун хас бувсса вагондалул чIавахьулттива чIалай бур «Дорога жизни». Вагоннаву ишла дурну дур та чIун, тай лахIзарду бивкIсса куццуй ккаккан бансса, асар хьунсса технологияртту. Экскурсия 45 минутрайсса бур. ЦалархIал ца вагондалувун уххан бюхълай бур 11 инсаннаща.

Андриана Аьбдуллаева