Аьдатравун багьсса куццуй, гьашинугу, майрал 8-мур кьини, хьунни Ккурккуллал шяраву Ххувшаврил парад.
Байрандалий гьуртту хьунни Лакрал райондалул бакIчи Зураб Куччаевгу. Гьар мудан кунма, гьашинугу жул байран хъун дан бувкIунни Ккурккуллал школалущал ччянияцIара дусшиву дусса Каспийскаллал С. Орджоникидзел цIанийсса Машиностроениялул ва сервисрал колледжрал преподавательтал ва студентътал. Вайннал ккаккан дунни Ххувшаврил кьинилун хас дурсса музыкалул программагу. Мукунма шикку гьуртту хьунни хасъсса аьралий операциялул гьурттучитал: Чувшиврул ордендалул заллу Хизри ва Халкьуннал Мажлисрал депутатнал кумагчи, «Каспий» батальондалувасса Кьурбан. Вайннал бахшиш бунни Ккурккуллал школалийсса Даниял Магьдиевлул цIанийсса Аьралуннал савлугърал музейран Бахмутово шяравусса талатавурттаву ишла хьусса ярагъ.
Шадлугърал мажлис байбивхьунни «БивкIу бакъасса полк» акциялия. Буттал кIанттул цIанийсса Хъунмасса дяъвилий жанну дуллуминнан ва гьурттучитуран шяраваллил майданнив дацIан дурсса гьайкалдануцI тIутIив дирхьуну махъ ихтилатру бунни Зураб Куччаевлул, Ккурккуллал школалул директор Кьурбан Гъужиевлул, шяраваллил адинистрациялул бакIчи Тамерлан Аьлиевлул, Даниял Магьдиевлул арснал Робертлул, шаэр Ханича Аьлиевал. Мукунма махъру лавхъунни Машиностроениялул ва сервисрал колледжрал экономикалул дарсирдал комиссиялул преподаватель, «Спасатель» тIисса волонтертурал кьюкьлул каялувчи Анжелика Абачараевал, вава колледжрал оьрус мазрал ва литературалул учитель Сабина Куяевал ва хорданул каялувчи Маржанат Аьлиевал.
Барчаллагьрай кIицI лаган, гьарица шинах Парадрал кьини Ккурккуллал вирттаврал гьайкалдануцI бишин цила чулуха хъунмасса чIапа тIутIал гьан байссар Ханичал душнил Раиса Бугъуннаевал (Рамазановал).
Колледжравасса хъамаллуран ва кьинисса Ккуркливсса аьрххи мюнпатсса ва тIайлабацIусса хьунни. Вайннал ххал бунни Ккурккуллал школалийсса Аьралуннал савлугърал музей. Парад дайдишиннин дунни «Георгиевская ленточка» акциягу. Шадлугърал мажлис къуртал хьуну махъ Вицхъав хьунни учебно-практический тренировкартту. Ххассалбувултрал кьюкьлувасса «Вертикаль» тIисса группалул студентътал ва преподавательтал бувчIунни Вицхъавсса ламуя ХъуннеххачIан.
Андриана Аьбдуллаева
