Жулла республикалул хъун шагьрулий лахъа-хъунну кIицI ларгунни Бюхттулсса Ххувшаву ларсун 79 шин шаву.
Республикалул Культуралул министерствалул, Халкьуннал творчествалул къатлул ва МахIачкъала шагьрулул Культуралул управлениялул сакин дурну, шагьрулул хъун майданнив хьунни «Культура» национал проектрал лагрулий щаллу дуллалисса «Журавли над Россией» фестиваль. Шикку республикалул паччахIлугърал ва фольклорданул коллективирттал, таксса гьурттучитурал щаллу бунни музыкалул личIи-личIисса номерду.
М. Горькийл цIанийсса Оьруснал драмалул театрданул хъунмур залдануву хьунни Ххувшаврил кьинилун хас дурсса хъуннасса концерт. Ва кьини залданувун бувкIсса бусравсса хъамаллуравух бия Дагъусттан Республикалул ХIукуматрал председательнал хъиривчу Муслим Телякавов, республикалул аьралий комиссар Дайтбек Мусттапаев, республикалул культуралул министр Зарема Буттаева ва м.ц.
Залданувун къалавгминнаща бюхълай бия театрданул хьхьичI бацIан бувсса хъуни экраннай ккаккан залданул сахIналий хъанахъимур. Концертрай гьуртту хьуна Дагъусттаннал опералул ва балетрал театрданул, Оьруснал театрданул, Т. Мурадовлул цIанийсса Дагъусттаннал паччахIлугърал филармониялул артистътал, Росгвардиялул аьралуннал Ухссавнил Ккавкказуллал округрал оператив назначениялул 102-мур личIисса бригадалул аьралий оркестр ва шагьрулул оьрчIал искусствардал 1-мур школалул тарбиялувтал.
Бадрижамал Аьлиева
