Гьар шинах кунма, гьашинугу Ххувшаврил кьини чIявусса агьали бавтIуна МахIачкъалаливсса Совет Союзрал кIийла Виричу, СССР-данул лайкь хьусса лётчик-испытатель АхIмад-Хан Султаннул гьайкалданучIан. Ва 1-мур ЦIувкIуллал жяматраву цIакь хьусса аьдатри. Амма, цIувкIул бакъагу, цайми шяраваллал агьлугу, хIатта цайми миллатралссагу бучIай Виричунал гьайкалданучIа тIутIив дишин.
Мажлисрал дайдихьу дуллай Ури-Мукьардал Ибрагьимлул , аьрай ливтIуцириннал аьпа баннав тIисса дуаь дурна. Мероприятие дачин дурну ия Дагъусттаннал Чичултрал союзрал лакрал секциялул каялувчи Супиян Оьмаров. Ванал дурккуна АхIмад-Хан Султаннун хас дурсса назмурду. Ххувшаврил байран барча дуллалисса ихтилатру бувна Москавлиясса хъамаличувнал, профессор Арсен ХIусайновлул. Ванал кIицI лавгуна гьарца шинал Москавлив 9-мур майрай, кIюрххил ссят 10-11-нний, дагъусттаннал миллатирттал халкь батIайшиву «Новодевичье» хIатталлив, АхIмад-Хан Султаннул ва цIанихсса парашютист Наби Аминтаевлул гьаттардий тIутIив дишин. Тиккун бучIайшиву Москавуллал лагмасса областирдаяссагу инсантал, архсса кIанттая бувкIссагу бикIайшиву. Бюхттулсса Ххувшаврил ва Ххувшаву ласун цащава шаймур бувсса Вирттаврал аьпалул хIурмат аякьалий ябуллан аьркиншиврия ихтилатру бувна профессор АьбдурахIман Халиловлул, АхIмад-Ханнул ссурахъил арс Сайдун ХIажикьурбановлул, машгьурсса радиожурналист Гъаза Гъазаевлул, Каспийск шагьрулиясса захIматрал ветеран Бадруттин Муслимовлул, Ваччиял ккурандалул каялувчи Давди Увайсовлул, СВО-лий гьуртту хъанахъисса Абачарал нину Сабринал. МахIачкъалаллал школардай дуклакисса цIувкIуллал оьрчIал дурккуна аьралий тема аьч дуллалисса назмурду.
«ХIакьину Бюхттулсса Ххувшаврил сий яларай дуван чялиш бувксса гужру бур дунияллий, хаснува СССР-данувун дагьлай диркIсса билаятирттай.Буссия ца билаят, ца дяъви, Ххувшавугу цар, къювугу аьмссар. Совет Союзрал циняв республикарттал аьмсса тарихгу буссар, Ххувшавугу аьмссар, мунияту тарихрал хIурмат бикIангу аьркинссар. Ппухълуннал бюхттулну чивчусса тарих я бяйкьин, я баччан буллансса ихтияр щихьчIав дакъассар. Дяъвилул щавщи къабивсса цавагу кулпатгу бакъассар,мунияту жулва адаврал буржри аьрая зана къавхьуминнал аьпа хIурматрай ябаву. ХIакьину шиккун цачIун батIаврийнугу жува ккаккан буллалиссару жучIава бюхттулсса кьиматрай душиву захIматну ларсъсса Ххувшаву. ЧIявуми цалва оьрчIащал ва оьрчIал оьрчIащал бувкIун бур шиккун. Нитти-буттахъал цалва кулпатрал тарихрая буслан аьркинссар оьрчIахь, гьарцагу кулпатрал тарих дяъвилуцIун бавхIуссар», – увкуна Супиян Оьмаровлул. «Хъунмасса пахру багьлай бур бусалардавун агьсса, бюхттулсса летчикнал цIа бюхттулну ядуллай бушиврия. Вирттал цинявннан ххиранугу бикIан аьркинни. Яла-яларив, дакI ххари хъанан дикIай, муданма кунма, чIявусса оьрчIру гьайкалданучIан бучIаврия. Вагу миннансса ца чувшиврул дарсри», – увкуна СВО-лий жан дуллусса шагьиднал МахIаммадал ппу ХIусайн СантIуевлул.
ПатIимат Рамазанова
