Уттигъанну Дагъусттаннал технический университетрал Аьралий центрданий «Ххувшаврил багъ» бунни. Ректор Назим Баламирзаев гьурттуну, университетрал хъуниминнал ва курсантътурал мурхьру бувгьунни. Щин рутIлай, вай мурхьирдаха хIурмат буллантIиссар цивппа курсантътал.

«Ва Багъраву бувгьусса гьарцагу мурхь – Вирттаврал аьпа уттава баврил ххуллийсса давур. Жунма оьрмугу, тархъаншивугу пишкаш дурминнахьсса барчаллагьри», – увкунни ректорнал.
Махъру лавхъцириннал кIицI лавгунни, давугу кьариртуну, Ватан дуручлан лавгсса преподавательтурал ва дуккавугу дяличIан дурну лавгса студентътурал аьпа хIурматрай ябуллалаву – жуйвасса бурж бушиву, ялун нанисса никирангу чара бакъа билаятрал бюхттулсса тарихрая ва вирттаврая кIулну бикIан аьркиншиву.
ДукIугу Ххувшаврил байран дучIан хьхьичI гьантрай, вара Аьралий центрданий Буттал кIанттул цIанийсса Хъунмасса дяъвилий ливтIуцириннан ва СВО-лий жанну харж дурцириннан хас дурсса, Аьпалул чIира тIитIлатIисса мероприятие дурссия.
Ва ЧIирайн лархъун дуссар Буттал кIанттул цIанийсса Хъун дяъвилия ва СВО-лия зана къавхьусса преподавательтурал ва студентътурал суратру.
Утти Аьралий центрданул «Ххувшаврил багъраву» хъюлчай тIунтIиссар вирттал кунма бювхъусса мурхьру.