Октябрьданий Ккуллал райондалийсса школардай пагьламаншиву лахьхьин дуллалисса мастер-классру буллай байбивхьуссар. ЦIа ларгсса пагьламанчи Камил Маммаевлул «Хьхьуттайхсса цалчинсса ша. 

Пагьламаншиврул мобил школа» тIисса проект лайкь хьуссия Дагъусттаннал бакIчинал грантран. Камиллул жул кказитрал журналистътурахь бакIрайва бувсуна ва проект, гьамин цува увсса, хъуна хьусса Ккуллал райондалий бартдигьин ччай ушиву. Ва утти хъиндайдихьу дунни буттал шяравусса, 1-мур ЦIувкIравсса школалийгу, ЧIяйннал школалийгу. КIи-кIира кьинисса мастер-классру хьунни шикку.

«Ттул мурад анжагъ оьрчIру бялахъан бувансса бакъар. Ватандалий хьхьуттайх лахъултрал магьирлугъ цIу дуккан даврил ххуллийсса хъитри. Пагьламанчинал гьунар бусса оьрчIру ххал бавур ва миннан кумаг бувавур. Хьхьуттайх саргъунну шаттирду ласун хьусса оьрчIру ххарил лехлай бия, лагма лавгун, тасса-танингу ппивхьун ччай бакъая. Ва муницIухва, на вайннахь бусав пагьламаншиврул тарихраягу. Вагу тарихрал дарсиран хIисавссар. Школардал учительтал ва директортал уттива барчаллагьрай бия, оьрчIру гъира буну, рязину бур тIий. ХIакьину, октябрьданул 13-нний, Хъусращиял школалий зий буру.
Дарусса, баргъ бивтсса кьини дур. Гьавалийн бувккун, архъаннугу дархIуну, тяхъану, шадну зий буссару», – тIий ур Камил.
Ванал бувсунни райондалул 10 школалий ккаккан бувантIишиву мастер-классру.