Цалчинмур ЦIувкIратусса цIа ларгсса пагьламан Камил Маммаевлул бувсунни «БалансрачIансса цалчинмур ша» тIисса социал проектрал июньдалул курс къуртал хьушиву.

Ва Дагъусттаннал бакIчинал грант ларсъсса проект бартдигьин Камил гьар кьини кIюрххил Каспийск шагьрулул пляжрай оьрчIан, гъира буминнан хьхьуттайх лахъан лахьхьин буллай уссия.
«Анвар Аджиевлул цIанийсса 12-мур гимназиялул 30 дуклаки оьрчI занай уссия, вайннан хьхьуттай шару ласун, страховкалул техника лархьхьунни. ЦIу бутIуй вас-ццахлий гъан хъанай бивкIхьурча хьхьуттачIан, утти сивсуну гьаз хъанай буссар хьхьуттайн», – тIий ур Камил.
Ванал бувсунни цIакь хъанай душиву «Кулпатирттал бигьалагай кьинирду» тIисса программагу. Вай бигьалагай кьинирдай нитти-буттахъул оьрчIащал тренировкарттайн буккайсса кьинирдур.

«ЦIанакул, оьрчIру телефоннавун, компьютердавун кьувтIусса заманнай, мигу бувцуну, хьхьирил гьавалийн буккайсса нитти-буттахъул бур. Вайннангу ччай бия оьрчIавун хьхьуттайх лахълансса гъира бувтун. Пагьламантурал магьирлугъ цIу дуккан дуваврил ххуллийсса даву душивруцIун, оьрчIан ва нитти-буттан цанмагу мюнпатну чIун гьан дувансса давугур», – тIий ур хьхьуттайх лахъаврил ва лахъан лахьхьин баврил биялсса опыт ­бусса Камил.

Ва буттал шяраву Цалчинмур ЦIувкIрав пагьламантурал школалул тренернугу зий уссар. Гъинтнил каникуллай тIурчарив, шагьрулул оьрчIангу хьхьуттайх лахъан лахьхьин буллай ур.
«Та гьарчагу, хаснува бигьалагай кьинирдай, Камиллул архъандалучIа ккучу-ккучунну дикIай. Машгьурсса спортрал журалухун багьсса оьрчIаяр чIявусса бикIай. Пагьламаншиву – нажагьсса даву душавривугу бухьунссар иш. Камиллул ва магьирлугъ машгьур дансса, цIу дуккан дансса гъира-хIарачатмур барчаллагьран лайкьсса бур», – тIий ур оьрчIру ваначIан бувцуну учIайсса Руслан Муртузов.

ПатIимат Рамазанова