Чансса бакъар лакрал студентътураву, ххуйну дуклай бушивруцIун, вузрал ва жяматийсса оьрмулул иширттавухгу хьхьичIунну гьуртту хъанахъисса. ГьунчIукьатIрал шяравасса Къушиева ПатIимагу мукунминнавасса ца бур. Ва Асланнул арс Эриклул ва Амирчупаннул душ ПатIиматлул душ бур.
МахIачкъалалив Итххявхсса оьрчIансса Республикалул лицейгу (РМЛИ ДО) къуртал бувну, дуклан бувххун бур Москавлив Н. И. Пироговлул цIанийсса Медициналул университетравун. ЦIанасса чIумал 3-мур курсирай дуклай бур. ХьхьичIунсса студентътуравухсса ПатIима, мюнпатсса давурттавухгу хIала буххайсса бушиву хIисавравун лавсун, шинал хьхьичI бивтун бур Москавлив ва лагма-ялттусса шагьрурдай дуклакисса Дагъусттаннал Студентътурал ккураннал советрал председательну. Ванил уттинин бартдиргьусса проектирдавух дур цалчинсса кумаг буван лахьхьин буллалисса квест, Тверскаллал областьрайсса активистътал кIункIу бувсса.
«Жул командалул жура бартдигьин дакIнийсса давурттан ца миллиондалунсса 2 грант духхарду, 2 проект бакIуйн дуккан дувансса. Цалчинмур проект сентябрь зуруй бартдиргьуссар, республикалул студентътурал ккураннал фестиваль дурну. Утти ва май зурул ахирданий Студентътурал форум дуван дакIний буссару, муниха зий буссару», – тIий бур ПатIима.
Ванил гьурттушинна дувай Москавливсса лакрал культуралул мероприятиярттайгу. Расул ХIамзатовлун хас дурсса литературалул вечер лавайсса даражалий тIайла дуккан захIмат бихьлай бивкIцириннавух вагу бивкIссар. Мукунма гьашинугу Дагъусттаннал миллатирттал ярмаркалийгу чялишну гьуртту хьуну бур « Зунттурдал ххуллу: аьдатирттал ххуллийх» тIисса номер ккаккан бувну. ПатIимал бур къавтIаврил гьунаргу, дуллалицири мероприятияртту ванил къавтIун бивзунгу шад дувайсса дур. Бюхъу бусса пишакартурах, хьхьичIунну вузру къуртал бувсса выпускниктурах ялугьлай буссар Дагъусттаннайгу.
ЧIа учинну дуккавривугу, дуллалимунивугу итххявхсса ва лаккудушнин оьрмулул ххуллийгу, гьармунивугу тIайлабацIу!
ПатIимат Рамазанова
