Апрельданул 12-нний Дагъусттаннал бакIчи Сергей Меликовлул наградартту дуллунни республикалул хьхьичIунну зузисса ялапарлувтуран. Ванал дуллунни наградартту аьпалул хьусса аьралийтурал мачча-гъанссаннан, культуралул, элмулул зузалтран.
«За заслуги перед Республикой Дагестан» тIисса орден дуллунни Аьрасатнал Виричу Сяид Ибрагьимовлун. Меликовлул бусаврийну, Ибрагьимов хъанай ур Аьрасатнал Виричунал бюхттулсса цIа ларсъсса 19-ннавасса ца. Ва хасъсса аьралий операция байбивхьуния шинай талай усса ур хьхьичIмур кьюкьлуву, гьуртту хьуну ур Красно-Лиманскоелул чулий, Лисичанскрай, талай ивкIун ур роталул командирну Авдеевкаллал чулий. ЦIанасса ппурттуву ур мотострелковый полкрал батальондалул командирну.
Республикалул каялувчинал паччахIлугърал наградартту дуллунни мукунна «Каспий» батальондалувасса ливтIусса доброволецтурал кулпатирттахьхьун. Ванал жижарагу бувну, дакI дансса махъру увкунни Башир Аьбдулссаламовлул, Кьурбан Аьшурбековлул, Рамазан ХIасановлул, МахIаммад Ибрагьимовлул, Бакмирза Мохоевлул ва Аьбдулла Мусаевлул мачча-гъаннахь.
«Жула ватанлувтурал лайкьсса давурттах яла лаваймур даражалий къулагъас дантIиссар. Хасъсса аьралий операциялул зоналий Дагъусттаннал виричусса арсурваврал гьарца ссятраву мюнпатну биттур буллай бур хьхьичI бивхьусса бигарду, дуручлай бур жула инсантурал мюхчаншиву. Жугу жущава шаймур банну, миннал гьунарду тачIав хъама къабитаншиврул», – увкунни региондалул бакIчинал.
Сергей Меликовлул «За доблестный труд» медаль дуллунни «Дагнефть» акционер обществалул зузала, геолог Александр Овечкиннун.
ПаччахIлугърал наградартту дуллунни культуралул зузалтрангу. Республикалул халкьуннал артистнал цIа дуллунни Росгвардиялул 102-мур бригадалул аьралуннал оркестрданул хъунама Илияс Бактамировлун, республикалул халкьуннал шаэр, Табасараннал театрданул литературалул ва драмалул бутIул каялувчи АьбдурахIим АьбдурахIмановлун, халкьуннал художестварттал сянатирттал лайкь хьусса усттар – «Артель Кубачи» АО-лул каялувчи Нариман Хурдаевлун.
«Дагъусттаннал аьрщарай муданнагу цIа диркIссар пагьму-гьунар бусса инсантурал, кьалан битай усттартурал, магьирсса сянаткартурал. Барча зун дуллусса хIурматрал цIарду», – увкунни Сергей Меликовлул.
