Уттигъанну, Новостройрайн лавгсса кIанттай, тивах арх бакъа,(Караман-2), итталун багьунни лакку мазрайсса цIа дусса ттучан «Лачак». 

Цукуннивсса ца гъилисса асар бувххунни дакIнивун, ваца ттунма гъансса инсантурал ужагърайн тIайла бавцIусса кунмасса. ЦIанакул ттучаннал цIардайн гьим дурагу къадуварчангу, лакку мазрайсса ихтилат баявриягума ххари шайсса чIун дуркIунни.
Шайссияв ххуйра-ххуйсса лакку цIа дусса ттучандалул чIарах буккан. Бувхра. КIул хьура залуннащал. Чапаево шяравасса ПатIимат Абакарова лявкъунни заллу.

Гьай-гьай, бусав нава ванихь ттучандалувун макьнатIисрал кунма, цIанил кIункIу бувшиву. Укун бувсунни ПатIиматлул цила давриягу, цIа дизавриягу: «На мадарасса шиннардий ххуйсса качествалул янналул, яъни брендирттал маша буллай буссияв. ЦIуххайссия агьалинахь, цукунсса лаххия тIалавну дуссарив, муштари рязину личIансса даражалий даву дуллайгу буссияв. Таний ттучан бакъассия, вотсап-группалуву заказру кьамул дуллай буссияв. КIира -шанна шинай ва давриха зий, ялу-ялун заказру чIяру хъанан диркIуна. Дахху-ласу дулларчангу, ттучан тIитIинсса пикригу бакъассия. На экономистну зий буссияв, диялсса чIунгу, захIматгу аьркинсса даву дия. Мажал хьувкун, машлулмур даврихагу зун бикIайссияв. Вотсап-группалувусса муштаринал сияхIгу хъун хъанай дия, размер тIайлабацIансса, къабацIансса нигь дунугу, душру лаххия тIалав дуллай бия. Даву сантирайн рутаншиврун, ттун чIалай бия ттучан тIитIин багьлай бушиву. Муштари увкIун, дакьаймур ххал дурну, лавсун гьаншиврул. Ттучангу ттула давричIан, ужагърачIан, навагу кIулсса, ттунмагу кIулсса инсантурачIан гъанну тIитIинсса хIукму бувссия. ЦIанил хIакъиравугу лахъину пикри буллай бивкIра. Мачча-гъаннащалгу маслихIат ккаклай. На язи дугьав «Лачак» тIисса цIа ва жула культуралуцIун, багьу-бизулуцIунгу дархIусса дунутIий», – тIий бур ПатIимат.

Ванил ва на архIал дакIнийн дичарду ми цIардугу, буккултрангу дакIнийн дичинну: карщи, мурцIу, бартбису карщи, щипун, ххюттущипун, къакъунттари чалагъай, миччахчалагъай, харалачак, мусил лачак, макIарай лачак, сакьалаткарщи, ганзкарщи, ккупIиз, бурса лачак, никIалай къери, бархат лачак, хъюрухъ лачак, палхун, бухариска лачак, хьхьюму чуру лачак, бадаку карщи. Ххи дуванссар буккултралгу цанна кIулми.

Ттучандалува бувккун шаппай нани ххуллийгу ттул бакIраву гьанай бия жура-журасса пикрирду. Миллатрал лаххиягу, миннул цIардугу так чIюлушин дакъар. ХIакьину ми хъунмурчIин музейрдал ва архиврдал хъусну лирчIун дунугу. Халкьуннал тарихри, культурар, ттатта-бавахъал хIурматри ва уттисса никирацIунссагу, ялун буккантIиминнацIунссагу дахIавур.



Лачак – жула бавахъал гьайбатри, лазилакьавур, адав ва массаври. Культуралул уттарасса, сагъсса лишанни. Цукссагу хIаллай хъирив ялугьлайнма личIара бавахъул кунма, ца мурцIу хьхьичIун, ца мурцIу махъун бувтсса хъамитайпа чIарах гьарча. Къулайшиврун тIий жува чил лаххияртту хьхьичIуннай дуллай буру. ИчIаллил кушулува, даврива букъаккайсса ниттихъан цукун ва циван къакъулайну бивкIссарив къакIулли на тIийкунсса куццуй лачак рутаву. Аьйлул гьим ттуйннагур. Къалавхьхьунни ттунгу му журалий лачак руртун занан. Ца-ца тIий кIиссурттай буккин хьунссар мукун лачакру дичайсса душру, ттунма кIулминнаву: Сапижат Мазаева, Саидат Кьурбанова, кувни Гульшан Хасаевагу. Къамудан буккайсса цаймигу бухьунссар. ДакIнийхтуну барчаллагьрай бура ттувунма укунсса гъилисса асарду бувтсса ПатIиматлуйн, лачакрал багьагу, кьадругу кIулну, ттучандалун дирзсса цIанихлу.

ПатIимат Рамазанова