[dropcap]Л[/dropcap]арина Оьмарова бур тамашачитуран багьавай ххира хьусса, лавайсса пишакаршиврул ва яргсса хасиятрал акт­риса, ца Лакрал театрданул тарихраву бакъасса, республикалул театрал магьирлугърал тарихраву лайкьсса кIану бугьан бювхъусса.

[dropcap]Л[/dropcap]акрал театрданул сахI­налийн ва бувккун бур 45 шинал хьхьичI Ереваннал театрал институтрал лакрал студиялул дипломрал давуну хьусса «Къириятрал цIаний» тIисса А. Ширванзадел спектакльдануву. АрхIалла дургьуну бивкIун бур лакрал студиялул цамургу дип­ломрал давриву – А. Островскийл «Чявхълуву» Катеринал роль.
Ми кIирагу роль хъинну усттарну дургьуну дурхха, Да­гъусттаннал прессалул хъуни­сса цIарду дурну дур спектакл­лаягу, дахьва зий байбивхьу­сса жагьилсса актрисаягу.
Тания шиннай Ларина Оьма­­ровал дургьуну дур личIи-личIисса хасиятрал сипатру аьч дуллалисса 70-лунниха лирчусса роллу: хъярчилсса ва пашмансса, хъинсса ва оьсса, хIиллакарсса ва лавмарт­сса. Цумур-цагу роль дургьуну дур дакIнийхтуну, тIабиаьтрал гьунар, кIулшивуртту, бюхъу ва оьрмулул опыт ишла бувну. Цу­ппа артисткарив мукIру хъанай бур, шинну наниссаксса, цилла дакIничIан яла гъанну душиву зунттал хъамитайпалул роллу. Ми мунил хъинну усттарну дугу-дугьай. ЛяличIисса, тикрал къашайсса ранг ва так цинма хасъсса хатI бусса роллуну хьуссар В. Эфендиевлул «Шагьсаланнул тIюва» тIисса спектакльданува­сса Шагьсаланнул роль, Москавлия бувкIсса театрал ишккаккултрал лавайсса кьиматрай кIицI ларгсса.
Ухссавнил АьсатIиннал хъуншагьрулий хьусса дунияллул халкьуннал дянивсса фестивальданий «Бернардал къатта» спектакльдануву Ларинал дургьусса Понсиял рольданул Москавлиясса жюри хIайран бувну бия. Тайннал ва лащан бувуна Аьрасатнал ПаччахIлугърал Малый театрданул «бюхттулсса къар­ттаха». «Актрисал чувчIав зия къадурунни сипатрал тIабиаьт – я ихтилатраву, я тIуллаву. Спектакль байбивхьуну къуртал хьунцIа цила хасиятрайн хаин къавхьуну, темалуву бия», — увкуна тайннал.
Республикалул актертурал магьирлугъ хьхьичIуннай дан бувсса захIматрахлу Ларина Оьма­рова лайкь хьуссар ДР-лул халкьуннал артисткал цIанин, ласлай буссар Дагъусттан Рес­публикалул Президентнал стипендия.
Гулизар Султанова,
Аьрасатнал магьирлугърал лайкь хьусса ишккакку