[dropcap]О[/dropcap]ктябрьданул 2-нний Поэзиялул театрдануву хьунни ДР-лул Музыкантътурал союзрал председатель, АьФ-лул искусствалул лайкь хьусса ишккакку, профессор Хан Башировлущалсса хьунабакьаву. Му дачин дурну ия Поэзиялул театрданул директорнал хъиривчу Ссупиян Оьмаров.
Бадрижамал Аьлиева
Хан Башировлул ва хьунабакьаву дайдирхьунни Мурад Къажлаевлул ва Наби Дагировлул произведениярттайну. Хъирив, цахьхьунма буллусса суаллахьхьун жавабру дуллай, бувсунни цалла цукунсса ургаву дуссарив поэзиялух, бувккунни цанма ххирасса шеърирдавасса парчри. Оьруснал, дунияллул шаэртураву ванан яла ххирама усса ия А.С. Пушкин, дагъусттанналминнаву – Р. ХIамзатов.
БавтIминнал гъирарай вичIи дирхьунни Хан Башировлул цалва кулпатрая, школалийсса ва муния гихуннай музыкалул училищалувусса, консерваториялувусса, ДГУ-лул тарихрал факультетрайсса дуккавриясса, захIматрал ххуллиясса, му ххуллий хьунабавкьусса инсантураясса, хьунабакьавурттаясса, му ххуллийсса цалчинсса ххувшавурттаясса хавардах. Бувсунни Р. ХIамзатовлул мукъурттийн бувну цалва МахIачкъала шагьрулун хасну чивчусса балайлия, цил премьерагу уттигъанну, шагьрулул юбилейрал кьини, хьусса.
Гихунмай, цахьхьунма буллусса суаллахьхьун жавабру дуллай, Хан Башировлул бувсунни, Аьрасатнал ва Дагъусттаннал кинорежиссертурал оьвкуну, художествалул кинордаву цалла дурсса гьурттушиндарая: «Белое солнце пустыни», «Похождения графа Невзорова», «Сказание о Хочбаре», «Рай под сенью сабель», «Тайна рукописного Корана», «Платон». Миннувасса цаппараннувасса парчригу ккаккан бунни.
