ОьрчIру буруччаврил кьинилун хасъсса хъуннасса шадлугъ кIицI ларгунни цIуминалийсса ЦIуссалакрал гимназиялийгу. Му даврил сакиншинначиталну бия ЦIуссалакрал райондалул администрация, райондалул кIулшивуртту дулаврил ва культуралул управленияртту, райондалул спортрал, туризмалул ва жагьилтурал иширттал комитет.
ОьрчIру барча бан бувкIун бия ЦIуссалакрал райондалул администрациялул бакIчинал хъиривчутал Алик Исрапилов ва ХIажи ХIажиев, райондалул КIулшивуртту дулаврил управлениялул хъунаманал хъиривчу Светлана Къудаева, КIулшивуртту дулаврил управлениялул методист Мисиду Шагьмандарова.
Байран дайдишиннин оьрчIал дянив баян бувну бия сурат дишаврил конкурсгу.
Балайлул, къавтIаврил, спортрал гьунарду ккаккан бунни Новостройрайсса школардал оьрчIал, оьрчIал творчествардал къатрал, искусствалул школардал, оьрчIал ва чIава жагьилтурал спортрал школардал коллективирттал.
Шадлугъ наниссаксса хIаллай оьрчIал неъмат лавсунни цанна ххирасса мороженыйрттая ва нацIу-кьацIурдая. Конкурсирдаву ва концертрай гьуртту хьуминнайх дарчIунни личIи-личIисса бахшишру.
Байран къуртал хьуну махъ бусравсса хъамал лавгунни гиккун бучIан къавхьусса цIуллу-сагъшиврул мушакъатсса оьрчIру барча буван, миннан хъин-хъинсса бахшишругу ларсун.

И. Саидова