Март зурул 27-нний Каспийскалий хьунни Аьрасатнал национал гвардиялул аьралуннал федерал службалул кьинилун хас дурсса шадлугърал мероприятияртту.
Шикку гьуртту хьунни Дагъусттаннал ХIукуматрал председательнал хъиривчу Рамазан ЖахIпаров, Аьрасатнал ФСБ-лул управлениялул Дагъусттаннайсса хъунама Ал
ександр Миронов, Дагъусттаннал Виваллил иширттал министр Аьвдурашид МахIаммадов, Росгвардиялул управлениялул хъунама МахIаммад Баачилов, Росгвардиялул личIисса бригадалул командир Игорь Семиляк. 2-мур ОМОН-лул къатрал хIаятравун ккаккиялун дуккан дурну дия хасъсса подразделениялул зузалтрал ишла дайсса личIи-личIисса журалул техника ва ярагъ. Ми ххал дурну махъ цинявппа бавтIунни Управлениялул актовый залданувун. Шадлугърал мажлис тIитIлай, ихтилат бунни Росгвардиялул генерал-лейтенант Игорь Семиляклул.
— ХIакьину жу кIицI лаглай буру цалчинсса жула пишалул байран – Аьрасатнал национал гвардиялул аьралуннал кьини.
Аьрасатнал национал гвардия сакин хьуну ца шин хьуну дунугу, виваллил къарал хIисаврай вайннал гьану бивзссар 1811-ку шиналва.
