Жунма чIалачIисса куццуй, Украиннаву вай махъсса шиннардий чIярусса Аьрасатнал тарихрацIун дархIусса гьайкаллу ппив дурну кьадиртунни, ппив дуллайгу бур. Жуннагу хъинну нигьачIин дур тикку бувччусса жула инсантурал гьаврдугу, кIалабарзругу зия къабан тIий.

Мунийн бувну, дакIнин утан ччай бур Киеврайсса хIатталлив увччусса ГьунчIукьатIрал шяравасса, Буттал кIанттул цIанийсса Хъун дяъвилуву гьурттушин дурсса Чавтараев Султан МахIаммадлул арс.
Султан увну ур 1916 шинал. Ванал буттан хъинну ххуйну ­аьраб маз кIулну бивкIссар. Султан цувагу ххишала акъа итххявхсса, дуккин хIарачат бусса инсан ивкIун ур. ГьунчIукьатIув школагу къуртал бувну, ванал бувккуссар Гъумук педучилище. Зий ивкIссар Шушияв дарсру дихьлай. Ванищала архIал ва ивкIун ур парторганизациялул секретарьнугу. Кулпатралгу хьуну, бувну бур оьрчIгу, душгу. Амма, дяъвилул шиннардий кIивагу оьрчI бивкIуну бур.
Дяъви байбишиннинма Султаннул МахIачкъалалив Педагогикалул институт къуртал бувну бур. Му ппурттуву дяъви байбивхьуну лавгун ур фронтрайн. Душманнащал хъинну кьянкьану талай ивкIун ур. Щаву дирну, гагу хъин дурну, махъунай фронтрайн зана хьуну ур. Султан ивкIссар батальондалул командирну. Дяъви къуртал хьуннин талай ивкIссар душманнащал. Ккаккан дурсса виричушиврухлу Чавтараев Султаннун дуллуну дур ЯтIул ттугълил, ЯтIул цIукул, Суворовлул ва Буттал кIанттул цIанийсса Хъун дяъвилул 1-мур даражалул орденну, ми дакъасса медальлугу.
Дяъви къуртал хьуну махъ Султаннул къуртал бувну бур Аьралуннал академия. Мунищала архIал заочныйну къуртал бувну бур Ххуллурдал институтгу. Зий ивкIун ур оборонный объектирдал инспекторну. Яхъанай ивкIун ур Киеврай. Тиккува бувну бур кIилчинмур кулпатгу, амма ваницIа оьрчIру къабивкIун бур. Подполковникнал ­чиндалий увккун ур ­отставкалийн.
Аьралуннава лагайхту, Султаннул къуртал бувну бур ца институт ялагу – Политехнический. Му куццуй, МахIаммадлул арс Чавтараев Султаннул хъанай дур мукьра (!) ларайсса даражалул кIулшиву! Ванал къуртал бувну бур Педагогический, Автодорожный, Политехнический институтру ва Аьралуннал академия. Политехнический институт бувккуну махъ ва ивтун ур Киеврайсса Биохимический заводрал директорну. Дунияллия гьаннин му къуллугърай зий ивкIун ур. Шикку хьун дурсса ккаккиярттахлу ванан дуллуну дур ЗахIматрал ЯтIул ттугълил ва ХIурматрал лишандалул орденну. Султаннул бувтун бур кутIасса, амма хъинну яргсса оьрму. Дурагу 53 шин оьрмулул хьуну, 1971-ку шинал лавгун ур дунияллия. Увччуну ур Киеврай. Пикри бангума захIматри, циксса давуртту ялагу данссия Султаннул ца ацIра-ацIния ххюра шинай ялагу ивтссания. Ва кутIасса оьрмулийгума ванал дурну дур цайминнал кIива-шанма оьрмулий къаданмур.
Архсса кIанттурдай давурттай зий унугу Султаннул, такIуйгу буттал шяраваллищал дахIаву чан къадайва. Цащава чIун-чIумуй ГьунчIукьатIув укIлан хъанай бакъахьувкун, ванал тавакъю бувну бия цала уссил арс Хаважа Киеврайн гьан увара, тийхва дуклан ва цачIава яхъанан куну. Мяйжаннугу, ванал уссил ХIусайннул арс Хаважа цаппара хIаллайсса Киеврай яхъанай ивкIссар цала буттауссу СултаннучIа.
Ва куццуй ххаллилсса, хъинну ас-ламус бусса ивкIун ур ГьунчIукьатIрал шяравасса Султан Чавтараев. Ва хъанай ур щалагу лакрал пахру бан лайкьсса инсан. Укунсса арамтурая эбрат ласлай, тарбия дуллан аьркинссар жула ялун нанисса ник. Жуна дакIний уссаксса ва сагъну уссар!

Зиябуттин ХIажимирзаев,
Дагъусттаннал лайкь хьусса строитель
Макьалалуву ишла бувссар ттула шяравучу Амин Аьбдуллаевлул цаппара сведенияртту.