ГьунчIукьатIрал шяраву абад бунни хасъсса аьралий операциялий ватандалул ххуллий чувшиврий жанну дуллусса МахIаммад Ихаевлул ва Закир Аьлиевлул аьпа.

Дяшяраву Буттал кIанттул цIанийсса Хъунмасса дяъвилия зана къавхьуминнан цIа кусса Аьпалул чIирай лархъу­нни мармарчарил ултти. Вай кIиягу цала хушрай лавгун бур паччахIлугърал мурадру биттур буллан, контракт чирчуну.

Аьпалул митинграй гьуртту хьунни шагьрурдая бувкIсса хъамал, вирттаврал гъанчу, дуклаки оьрчIру, шяраваллил жямат.
Митинг тIигу-тиртIуну, дачин дурну ия аьралийтурал аьпа абад бансса даврил сиптачи хьу­сса шяравучу, жяматийсса иш­ккакку, ДР-лул транспортрал ва ххуллурдал хозяйствалул министерствалул отделданул каялувчи Зиябуттин ХIажимирзаев.
Ванал кIицI лавгунни гьарцагу аьпалул ула хъанахъишиву жула гьарцаннал аьмсса къювуну. «Жува буржлувссару ватандалул ххуллий жан харж дур­сса цумацагу аьскар жула хъирив нанисса никиран кIулну икIансса давуртту махъ кьаритан», – увкунни ванал.

Райондалул бакIчи Зураб Куччаевлул цIания аьралийтурал гъанчунахь жижара бу­нни ванал хъиривчу Малик ХIусмановлул.
«Хасъсса аьралий операциялий гьуртту хъанахъисса цумацагу жула ватанлув – хIакьсса виричури, цала аьралий бурж яхI-къириятрай биттур буллалисса. Жула мурад – ватандалул ххуллий жан кьурван дурсса гьарцаннал аьпа буруччавур», – увкунни ванал.
ДР-лул Халкьуннал Мажлисрал депутат Марат Илиясовлул кIицI лавгунни цала жагьилсса жаннай хIайп къакуну, ватандалул мурадру буруччин лавгсса вирттал халкьу­ннал дакIурдива къабуккантIишиву. «Жуйвасса буржри вайннал кулпатирттал чIарав бацIан, вайннал цIарду тарихраву личIансса давур­тту дуллан. ХIакьинусса мероприятиягу хъанахъиссар вайннал виричушиврул хIурматрал лишанну», – увкунни ванал.

Аьралий комиссар Аьли ГъазимахIаммадовлул агьам­сса ххуттай кIицI лавгунни хасъсса аьралий операциялий жа­нну дуллуминнал аьпалул ултти Буттал кIанттул цIанийсса Хъун дяъвилия зана къавхьуминнал цIарду абад дурсса чIирай ришлай бушиврул мяъна. «Жунна чIалай дур жула халкьуннал виричушиврул аьдатру никирая никирайн нанисса душиву. Тта­ттахъал аьпалул ва чувшиврул эбратрай буручлай буссар вайннал наслугу ватандалул мурадру. Никирттал дянивсса дахIавугу дурурччуну, гьарцагу солдатнал аьпа ябаву – жула яла къалагай­сса буржри», – увкунни ванал.

Ихтилатру бунни ДР-лул Жяматийсса Палаталул хъунаманал хъиривчу Ссапарбаг Аьбдуллаевлул, «Илчи» кказитрал хъунама редактор Руслан Къардашовлул, ГьунчIукьатIрал шяраваллил бакIчи МухIад Штанчаевлул. Гьарма кIицI лаглай бия ватандалул ххуллий жанну дуллуминнал виричушиврул хIурмат буруччаву, ттизаманнул вир­ттаврал эбратрай ялун нанисса ник ватан ххирану тарбия даву агьамсса къулагъасралу дикIан багьлай бушиву.
Дуклаки оьрчIал дуркку­нни ватандалухасса ва аьралий темалун хас дурсса назмурду. Цащала къюву ва кьурчIишиву кIидачIин бувкIцириннахь барчаллагь увкунни аьралийтурал гъанчунал.

Зулайхат Тахакьаева