Уттигъанну Москавлив «Россия» тIисса национал центрданий хьунни «Твой ход – 2024» тIисса Аьрасатнал студентътурал форумрал хIасиллу дуллалисса шадлугърал даражалийсса мажлис. Форумрай гьуртту хьунни билаятрал 89 региондалиясса 400-нния ливчусса вузирдавасса 2500 студент.

Ванил сиптачитал ва сакиншинначитал хьунни «Росмолодежь», Аьрасатнал КIулшивуртту дулаврил министерство, Аьрасатнал Жагьилтурал союз, «Ро­ссия – страна возможностей» президентнал платформа, «Больше, чем путешествие» тIисса Аьрасатнал жагьилтурал программа.
ХIасиллу дуллалисса мажлисрай гьуртту хьунни АьФ-лул Президентнал Администрациялул каялувчинал цалчинма хъиривчу Сергей Кириенко. Шикку хьхьичIунсса кIанттурду бувгьусса студентътуран призран буллунни ца-ца миллион.
Форумрай хьхьичIунсса кIа­ну бувгьунни Дагъусттаннал паччахIлугърал медициналул университетрал 4-мур курсрал студент, Ц1уссалакрал райондалиясса Даниял Шабановлул. Конкурсрай ванал ккаккан дунни «Вейпы или здоровье нации?» тIисса элмийсса проект. Конкурсрал дайдихьу дурссар январьданул 25-нний. Даниял, вузраву хьхьичIунну дуклакаврицIун, медициналул элмийсса ахттаршиннардугу дуллалисса студент ур.
Шамилчинмур курсрай Данияллул фармакологиялул кафедралул хъунмур Зульфия Ма­хIаммадоващал жагьилтурал цIуллу-сагъшиврун электрон журалул къалиян учавриясса зараллая элмийсса макьала чирчуну дур.
– «Твой ход – 2024» тIисса Аьра­сатнал студентътурал дянивсса конкурсрайн элмийсса ахттаршиннардал проектругу кьамул дуллалишиву кIул шайхту, пикри хьуна ттуламур проектгу гьарта-гьарзагу дурну, дулун. Проектрал лагрулий, вузрал студентътурал дянив электрон къалиян (вейп) учайсса дурив, дакъарив, миннуя цукун­сса зарал буссарив цIухху-бусу бувссия. Мукунма­сса цIухху-бусу бувссия, жула билаятрай­сса хьхьичIунсса вузирдал бакъассагу, Донецкаллал, Луганскаллал Халкьуннал Республикардайсса, Запорожскаллал ва Херсонскаллал областьтирдайсса вузирдал студентътурахь. Му бакъассагу, проектрал лагрулий ДГМУ-лул волонтертуращал Ххувшаврил байрандалун хасну дурссия «Россия за здоровый образ жизни» тIисса, цIуллу-сагъшиву дуруччаву мурадрайсса квест ва спортрал акция, хьхьирил зуманив зарядка дуллалисса, кьинилун 10 000 ша ласласисса квест, – буслай ур Даниял.
Проектрал лагрулий Даниял гьуртту хьуну ур майрал 26-нний ДГМУ-луву хьусса Щалагу Аьрасатнал жагьилсса аьлимтурал дянивсса элмийсса конференциялий. Шиккугу вейпирдая ва муницIун бавхIуну цIуллу-сагъшиврун биллалисса зараллая бусласисса ванал элмийсса ахттаршиннаран лавайсса кьимат бивщуну бур.
Дагъусттаннал жагьилтурал цIуллу-сагъшиву дуруччаву мурадрай, педиатриялул факультетран 55 шин шаврин хасну, Данияллул цала командалущал дуклаки оьрчIан ва студентътуран медициналул цалчинсса кумаг бан лахьхьин буллалисса форум бувну бур. Ва форумрай гьуртту хьуну бур 150 дуклаки оьрчI, 150 нину-ппу, 50 медициналул пишакар ва 50-нния ливчусса ДГМУ-рал преподавательтал.
АьФ-лул ПаччахIлугърал Думалул депутат Султан ХIамзаев­лул барча унни лавайсса даражалул форумрай ххув хьусса Даниял, кIицI лавгунни укунсса жагьилтурал чIарав ацIан мудан хIадурну ушиву.
ДакIнин бутанну, 11-мур классраву дуклакисса ппурттуву Данияллул, 2020-ку шинал, «Большая перемена» тIисса щалвагу Аьрасатнал конкурсрай 1-мур кIану бувгьуну бивкIшиву. Ванан ва конкурсрайгу призран миллион буллуссар.
Гьай-гьай, бувчIлай бур хьхьичI бивхьусса мурадрайн ияншиврул хъунмасса захIмат бишин аьркиншиву. Данияллул исват бунни ччан бикIарчан, захIматрайнугу, хIарачатрайнугу ччимур лахъазан лахъан бюхъан­тIишиву.
Жула лаккуоьрчIал бюх­ттулсса ххувшавуртту барча дуллай, уттиния тийнмайгу ххарину мунал ккаккиярттая буслан хIадурссару. ТIайлабацIу баннав, миллатрал цIа-кьини бюх­ттул дансса арс укканнав!
Имара Саидова