Лакрал райондалул бакIчи Зураб Куччаевлул сипталий ххуллункьини гьарца щархъаву ларайсса сакиншиндарай хьунни хъуннасса субботник. Сайки кIира нюжмар ларгуна сакиншиндарал комитет ва субботникрайн хIадур хъанай.

Давурттал лагру ва идарарттал гуж хIисав бувну, гьарца коллективран ккаккан бувну бия лакьинсса кIанттурду.
Райондалул Телеграм ва МАКС каналлайгу гьарца кьини цIу дуклай дия агьалинавун гьавас бутансса, хъярч-махсаралийнусса баян бавуртту, оьвчавуртту. ХIасил, гьарца чулуха креативнайну хIадур хьуну бия субботникрайн. Лагу-ларгунни ца хъуннасса байрандалул лагрулий, шагьрурдаягу чIявусса халкьгу бувкIун. Лавгру «Илчилул» цаппарасса зузалт жугу, хъунама редактор Руслан Къардашов хьхьичIну, субботникрайгу гьуртту хьун, муния илданухьгу бусан.
Макьу даркьуну лув лявкъуна жун администрациялул къатрал хьхьичI идарарттал зузалт. Саргъунну кьюкьрай дарцIуну ялугьлай дия цIура-цIусса чIатIри, ххялаххив, чIатулттив, цIушив.

Администрациялул зузалтран ккаккан бувну бия Хан-Муртазааьлил мемориалданул лагма-ялттусса кIантту лакьин. Жугу гайннавух гьурттуну буссияв. Чан дакъая данмур. Булувкьуну байбивхьуру зий – цавай зиян уртту марцI дуллай, вайми кьаркьсса кьяртив, ччюрк датIлай, цавай мурхьру кIяла буллай, цавайгу мемориалданул къапулийх ва чапарданийх сир буклай.
Ва куццуй бавкьуну, гъирарай цин лархьхьусса тагьарданийн бувцунни инсантурал цивппа зузисса идарарттал лагма-ялттусса кIанттурду, яхъанахъисса кIичIиртту.
Агьали зий буссаксса хIаллай, Гъумучиял паркравух ришлай дия цIайннарал кьанкь, шикку 80 литра лагайсса ца хъунма къазандалуву ахттайнссаннун буллай бия пулав. Мунил ялув авцIуну ия «Гъази-Гъумучи» ихIсандалул фондрал каялувчи Тамерлан ХIабибуллаев, цувагу ттигъанну райондалул Жагьилтурал иширттал, спортрал ва туризмалул отделданул каялувчину ивтсса.

Субботник къуртал хьуннин ахттайн бивзуна, ахттайн чаклия махъ, кIири бувсса бургъилу бухха-базу хьусса агьали бувкIуна паркравун. Мурхьирдал ххютулу, зунттал гьавалий, чIелмултрал балайрдахгу вичIилий, цIийннарал кьанкь дусса пулав ва мукунна цIийннарай дирзсса самоварданува урттул чяйгу хIарчIун, бигьалавгуна агьали.
Съемкарду дансса бригадагу бувцуну увкIун ия «Дагестан» ВГТРК-лул хъунама директорнал хъиривчу Ссалам Хавчаев:
«Лакку билаятрайн къаувкIун мадара хIалли. УчIан ччай унува, сант дагьлай дакъая. ХIакьину тIурча ва байрандалул даражалий нанисса субботникрал чIарах уккан къабучIия. Вана ва Хан-Муртазааьлил мемориалданучIатур байбихьлахьисса Дагъусттаннал тарих. Мунийн бувну, ххарину ура, щала жямат бувккун, гьавас буну зий чIалай. Ккавккунни тIабиаьтрал апатIрайну зарал бивсса – лахIунтту зирзусса, валтру дагьсса кIанттурду. Дансса давуртту райондалий чIярусса дур. Мунияту на увкIра, ва субботникрая гьарза-гьартасса репортаж даву дакъасса, цIусса райондалул бакIчиналщагу интервью ласун, дурмуних ва хьхьичI бихьлахьисса мурадирттах вичIи дишин».

Магьди Айналов:
– Жула билаятрай агьали вардиш хьуну бур субботник Лениннул ляхъан дурссар тIий, му га дунияллийн увксса кьини апрельданул 22-нний дуллай. Амма жула лакрачIагу, Дагъусттаннал агьалиначIагу ччясса заманнайра аьдатравун дагьну диркIссар жямат бавтIун, щаращив, хIатталлу, ххуллурду, ччар дайсса кIанттурду марцI буллалаву. Му ххуттай дуллалиссару хIакьинусса субботникгу. Ххарину ура навагу хIакьину Гъумук субботникрай гьуртту хъанай ушиврия. Гъумучи лакрал лажинни, лажин мудан дикIан аьркинссар марцIну, чачIав бувкIсса хъамаллурал дахIалай чинну. Мунийн бувну, укунсса субботникру дуллан аьркинссар ччя-ччяни, хъуннасса чIун чIарах дуккан къариртун.
Вай бигьалагай гьантрай жула билаятрай медициналул зузалтрал байран кIицI лаглай духьувкун, райондалул цIуллу-сагъшиву дуруччаврил зузалт субботникрая махъ лавгуна БахIикIуллал шяравусса бигьалагай базалий байран кIицI дан.

Райондалул бакIчи Зураб Куччаевлущал ва Росгвардиялий зузисса Зураб Баккуновлущал вай гьантрай хасъсса аьралий операциялия игьалаган увкIсса НТВ-лул журналист жула Оьмар МахIаммадовгу, жугу бакIрайн багьру ва байрандалийн.

Зураб Куччаевлул барчаллагь увкунни райондалул хъунама хIакин АьбдурахIин Дибировлухь ва ванал коллективрахь, райондалул агьалинал цIуллу-сагъшиву дуруччаврил ялув цIакьну бавцIуну бушиврухлу. Барча бунни цIуллу-сагъшиву дуруччаврил зузалт Руслан Къардашовлулгу.
Оьмар МахIаммадовлул Барчаллагьрал чагъар буллунни райондалул азарханалул мюхчаншиврулсса буллалисса Бухари АлхIасанаевлун.