![](https://ilchi.info/wp-content/uploads/2020/10/marighggk_1.jpg)
Цукссава асар хьуну дакIнивун багьссарив, ччя- ччяни бусара ва хавар, утти буккултрахьгу бусанна. Новосибирск шагьрулий мина дирхьусса, Бархъаллал шяраватусса Кьаландарова Марияннун, цила иширай Москавлив бувкIсса ппурттуву, поликлиникалул хьулух бавцIусса пашмансса инсантурай ябавцIуну бур. Марияннун, чIарах бувккун най бунува, гайннал ихтилат бавну бур. Гай бивкIун бур нину ва душ, Москавлив цалла цIуллу-сагъшиврул ялув бувк1сса.
Гайннал лахъи бакъасса ихтилатрава Марияннун бувчIуну бур гай гьантта-чIумуй бацIансса кIанттух луглай бушиву. КутIану бусан, Марияннул бувцуну бур гай цичIанма шаппай. Тай ичIува буссаксса, щихьчIав къабувсун бур гай царив-цирив, кIукъакIулсса инсантал шаппай буцайссарив тIий, къадяъваншиврул. ХIасил, яхьуну бур гай Мариянхъанний шанма-мукьва гьантлий. Гай лавгун цаппара гьантравату МарияннучIан бувкIун бур тай цичIава бивкIсса хъамаллурал гьан бувсса хъунмасса тIутIал кацIгу ва ганицIунсса открыткагу. Открыткалийгу чивчуну бивкIун бур: «Жун оьрмулуву ина кунма хъиншиврул вибувцIусса хъамитайпа бакIрайн къабагьссар», — тIисса махъру.
[dropcap]М[/dropcap]арияннул чIявуну тикрал бувай: «Жуламири, чилмири, личIишиву цир, хъанай бухьурча кумаг бан. Ттуща чIявуну, му ттуйнма багьайсса зат бакъар куну, тийнмай бацIан къашай»,- тIий.
ЦIу дагьну Манасрайсса лакрал къатри ччувччусса чIумалгу бувкIуна «Дараччи» ккурандалул душвавращал. Тамансса шинну Новосибирск шагьрулий дурсса ва аьдат хьуну бур, динну, миллатру личIи къабуллай, инсан цува дакI тIиртIусса, мяърипат, духIин дусса ухьурча, миллатирттал дянивсса дусшиврул эбратгу, дакI марцIшивугу хьхьичIунсса душиву иширттайну ккаккан буллай.
Цамургу бусанна ванил хасият аьч дуллалисса иш. Ца ппурттуву, цила ласнащал (га ттун хьхьичIа ккавкссия, кIулссия), цила ца мурадрай, Марияннул оьвкуна ттуйн, нагу мунихьхьун му мурад щаллу бан кунасса инсаннал номер буллуссия. Цаппара хIаллава на Москавлив азарханалийн багьунав, Марияннул ттуйн оьвкуна, цилва мурад щаллу хьуннича, вихь барчаллагь учин, чяйлул истикан хIачIан щябикIан ччай бура тIий. ХхалаххикIиссакссарагу хъиншиву къадурсса ттуйнма кIилчингу оьвкукун бусан багьуна нава азарханалий Москавлив бушиву. Ца ссятрава ласнащал, Расуллущал ва душнищал бувкIуна азарханалийн, цинма тачIав къаккавксса инсанначIан биян. Мукунна на Марияннущал кIул хьуссагу. Шиккува кIицI лаган ччива ванил лас Расул Кьаландаров цала бюхъу- хIарачатрайну, аькьлулийну гьаз хьусса бизнесмен ушиву. ЧIявучин кIулссар Расул зирангсса, кьянкьасса адимина, итххявхсса экономист ушиву.
ТачIав политикалул иширттавухгу хIала къауххайшиву. Бархъаллал жяматрангу хъуни- хъунисса хъинбалартту бувма ушиву. Ванал хъар дургьуну, узданну къуццу тIутIисса Мариян Москавуллал «Дагъусттан» Культуралул центрданул президиумрал членнугу бур. Мариян Илиясовал цIанийсса «Дараччи» клубрал Москавливмур филиалданул хъунмургу бур. КIицI лавгсса центрданул хъунама Арсен ХIусайновлул тIийкун, ччимур масъала сивсуну ванийн тапшур бувайсса бур, магьирну дузрайн буккан бувантIишиву кIулну.
Вай махъсса шиннардий Москавлив «Илчилул» подписчиктал чIяву шавривугу Марияннулгу бутIа буссар. ДукIугу, гьашинугу Бархъаравгу тамансса кказитру чивчунни Кьаландаровхъал кулпатрал.
Гьашину коронавирусрал азар бала-апатIну ппив хьуну нанисса ппурттуву, Гъумуксса медициналул зузалтрал дакIру тирх учин дуван кунма, Марияннул сипталийну Москавливсса «Дараччилул» душваврал арцу дартIун, Дагъусттаннаймигу хIала бувххун, гьан дурссия арцу «азар къизгъинний» зий бивкIминнайх премия хIисаврай дачIин.
Цикссагу дур Мариян Кьаландаровал дурмунил сияхIрай халкьуннал дуаьлувух бишинсса уздансса давуртту. Октябрь зурул 14-нний Марияннул юбилейри. Барча вил юбилей, Мариян!
ПатIимат Рамазанова
![](https://ilchi.info/wp-content/uploads/2020/10/marighggk_3.jpg)
![](https://ilchi.info/wp-content/uploads/2020/10/marighggk_2.jpg)