[dropcap]В[/dropcap]а хIакьинусса паракьатсса оьрмулий жува яхъананшиврул, жухлура жанну кьурван дурссар хъинну чIявуссаннал. Ва Ххувшаву ларсмигу, хъинну чансса бакъа, ливчIун бакъар.
Ххувшаву сасан дуллай байбивхьуссар жула инсантал 1941-ку шинал июньдалул 22-нний. Гания шиннай ларгун дур 79 шин. Ми ца инсаннал оьрмулул шинну хъанай дур.
Жухлура жанну дуллусса чиваркIуннан хасну циняр жулла шяраваллаву дацIан дурну дур гьайкаллу. Аьпалул ва дягъулул кьини, ми жунма дакIния къалавгшиву цал ттигу мяйжан бан, бучIай жула инсантал ми гьайкаллачIан, дишай тIутIив, лахъай майлул чирахъру. Мукунсса акциярду хьунни ва ххуллухгу.
Ваччав
Шярава аьрайн лавгминнан хасну дурсса хъинну лахъсса гьайкал дуссар шяраваллил администрациялул чIарав. Июньдалул 22-сса кьини шикку тIутIив дишин бувкIун бия: Ккуллал райондалул бакIчи Шамил Рамазанов, Ветерантурал советрал председатель Аьбдул Загьидиев, администрациялул зузалт, культуралул зузалт, Ваччиял шяраваллил жямат.
ЧIяв
ЧIяйннал шярава дяъвилийн лавгминнан дацIан дурсса гьайкалдануцIгу вара кьини дирхьунни тIутIив. Дяъвилий гьуртту хьусса шяраваллил чиваркIуннал цIарду дакIнин дирчуна ЧIяйннал шяраваллил культуралул къатлул хъунмур Алхасова СалихIатлул. Бувсуна СССР-нул Виричунал цIанин лайкь хьусса ЧIяйннал шяравасса ЦIаххуй Маккаевлуя. Ихтилат бувна мукунма шяраваллил администрациялул хъунаманал хъиривчу Апанниева ПатIиматлул. ОьрчIал багъраву тарбия хъанахъисса Мудунов СалихIлул ва Жамалуттинова Аминал дурккуна дикломацияртту. Лавхъуна цайми-цаймигу махъру.