Ва иш хьуну ца барз лавгхьунссар, лавгнугу, барчаллагьрайсса инсантурал тавакъю щаллу буллай, чичлай буру.
Макка-Мадиналул мубараксса аьрщарая, хIажгу бувну, зана хьуну най бивкIун бур Муфтиятрал зузала МухIаммад Майрановлул каялувшиннаралусса группа. Самолетраву ца хъамитайпа хIалдания лаглан бивкIун бур. Ванин ва ванищал бивкIсса гъансса душнин хъунмасса талихI хьуну бур группалуву медициналул зузала бикIаву.
Укун буслай ур цува МухIаммад Майранов: «Жу оьмралия махъунмай зана хьуну най буссияв. Самолет, щядикIан, лагь хъанан дикIайхту, ца хъамитайпа хIалдания лаглан бивкIуна. Циявхьур, давление хъинну дагьну диркIун дия. Мунил тагьар ккарккун, чIарав щябивкIсса мунин маччасса душ нигьабувсуна, ванилмур тагьаргу оьнивун дагьуна, дайдирхьуна эпилепсиялул приступ. Инсантал, вайннал лагма лавгун, кумаг бан ччай, амма ци зунссарив къакIулну бия. Арх бакъа щябивкIун бия кIива лакку хъамитайпа: Куматусса Басират Аьлиева ва Гьажар Буттаева. Самолетраву авара гьаз шайхту, Басиратлул, анаварну хIала бувххун, цал эпилепсия хьумунин кумаг бувна, цийнма цуппа бучIан бувна. Ганин кумаг буллай Гьажаргу бия. Лагма-ялттуминнахьгу Басиратлул ци зунссарив бувсуна. Яла, вамур кIяла лавгсса хъамитайпа щяв уттубишин бувну, цичIарасса тонометралух давлениягу дурцуну, аьркинсса дарув буллуну, га цийнма цуппа бучIан бувна».
Ца-ца чIумал инсаннал оьрму ца-кIира минутIрайнгу хъар хъанан бикIайссар. Мугьлат бакъа, чIумуй ва тIайлану бувсса кумаграйну ххассал хьуну бикIан бюхъай вай инсантурал оьрмурду.
КIицI лаган, Басират фельдшерди. Ккурккуллал школагу къуртал бувну, 1981-ку шинал ва бувххун бур Буйнакскаллал медициналул училищалувун. Мунияр махъ зий бивкIун бур Лаващиял райондалийсса Буртани шяраву ФАП-рал заведующийну. 1988-ку шинал мичча Лакрал райондалийн БахIикIуллал ФАП-рал хъунмурну бувкIун бур. ХIакьинусса кьинигу шикку зий бур. Райондалийсса хьхьичIунсса медициналул зузалан ккаллину бур. Цила даву ххуйну кIулсса пишакар ва цIими ххисса инсан бур.
Ванил кумагчи хьусса Гьажар МахIачкъалаллал 22-мур лицейрал учительница бур.
Ва кьини захIматсса тагьарданувун багьсса инсантуран кумаг баврийнугу вайннал чирилул ххуллийсса цала давуртту ххишала дурну дур.
Зу кумаг бувминналгу, жулагу цIания барчаллагь тIий буру зухь, ххаллилсса лаккудушрув. Зул хIажгу, дурсса дуаьрдугу АллагьначIа кьамулну лякъиннав.
Андриана Аьбдуллаева
