ЦIана ихтилат бан ччисса инсаннащал на кIул хьуну хъанай дур 8 шин. Цалчин ва ттуйн бакIрайн агьуна Ваччиял даралуву школалул оьрчIал дянив туризмалул тIуркIурду буллалисса кьини. Ва гикку, аккордеонгу бивщуну, балайрду тIий ия. Ва ур Ссухъиящиял шяравасса Рамазан Кьурбановлул арс ХIабибуллагь. Хьуссара на ХIабибуллагьлул къатта-къушлийгу. Ва ур магьирлугърал аралуву гьунар ххину бартбигьлагьисса инсан.
– На увссара Ссухъиящиял шяраву 1970-ку шинал. Ттул ниттийн ПатIимат, буттайн Рамазан учайссар. Жул кулпатраву ттуяр хъунмасса Шюъбанат тIисса ссугу буссия. Амма ччяни ахиратрахьхьун лавгунни. Буссар ттуярва чIивисса, Нурият тIисса, ссугу. На шяраву къуртал бувссия байбихьулул школа. Яламур бувккуссар Вихьлив. Гара шинал дуклан увхссияв Дагъусттаннал Культпросвет училищалувун. Му къуртал бувссия 1992-ку шинал.
Мира шиннардий лахъав армиягу. Зий икIайссияв цал Къяннал, яла Ссухъиящиял шяраваллал культуралул къатрал директорну. Мунияр махъ цаппара шинну дував Лаващиял райондалийсса школарттай музыкалул дарсирдал учительну зий. Яла лавгссияв Лакрал райондалул къутаннайсса школарттай музыкалул дарсру дихьлан — КIамахъаллал, Карашрал, ГьунчIукьатIрал, КIундиннал. Ми школарттай дарсру дихьлахьисса чIумуй оьрчIру гьуртту хьуссар райондалий, республикалий шайсса конкурсирттавух бувгьуссар хьхьичIунсса кIанттурду. Яла на зана хьуссияв 2011-ку шинал Ккуллал райондалийн. ХIакьинусса кьинигу шиккува зий ура.
ХIабибуллагьлул бувсмунил ялун ххи бан ччива ца укунсса затгу. «Илчи» кказитрал корреспондентну зузисса, Ппалассуннал шяравасса АьбдурахIманова Залму мудан ттухь: «ХIабибуллагьлухь ссалам буси», – тIун бикIай. Мукунма тIутIисса инсантал ттун ялагу хьунабавкьуссар. Миннавух «Илчи» кказитрал хъунама редактор Руслан Башаевгу. Иширах бургарча, ХIабибуллагьлул бусравсса «аьш» кьадиртун дур цува зий ивкIсса кIанттурдайсса инсантурал дянив.
«Вила пикрилий, ча дайдирхьухьунссар культуралучIансса, искусствалучIансса ша ласаву?» – тIисса суалданун ХIабибуллагьлул бувсуна Вихьуллал школалий дуклакисса чIумал цува инсантурал, тIабиаьтрал суратру дихьлахьисса хIисав хьуну, учитель МахIаммадов Худайл маслихIат бувну бивкIшиву Заннал буллусса пагьму дакIния гьан мабитара куну.
ХIабибуллагьлул дишайссар культуралул къатлун аьркинсса чагъардайсса суратру, дувайссар чичрурдугу, цирдагу хъинну авурсса хIарпирдай.
Шиккува бусан, бур ванаву назмурду чичаврил пагьмугу. АхIмад-Хан Султан увну 100 шин там хъанахъисса шадлугъирттай ванал цала ляхъан бувсса, АхIмад-Хан Султаннун хас бувсса балай щаллу бувна. ХIабибуллагь ур цала миллатрал къавтIавуртту кIулсса, ххуйсса къавтIалагу. Бур ванаву артистнал пагьмугу.
Махъсса ппурттуву телевизорданувух ккаккан дуллай бия «Вихьуллал къавтIаву» тIисса чIинчIурдавусса къавтIаву. Гиву ия Кьурбанов ХIабибуллагь ва Хъусращиял культуралул зузала Ванатиев Гриша.
Лагайссар ХIабибуллагь Ккуллал райондалул культуралул зузалтращал МахIачкъалалив шайсса фестиваллайн, конкурсирттайн, личIи-личIисса байраннан хас дурсса шадлугъирттайн. Гиккугу зун лакрал миллатрал лаххиялуву ххал хьунтIиссар ХIабибуллагь. Ванал язи дургьусса касмурив дур дакIнил тIалавшиннарайсса. Дур диялсса грамотарттугу, дипломругу, бахшишругу.
Адаминал ишру хъиннува капливун багьну бачай, мунал шардасса тагьаргу саргъунсса духьурча.
ХIабибуллагьлул кулпат ХIусайнатлул хIасул дурну дур ванал тIювалий гъилишиву ва паракьатшиву. Вайннал тарбия бувну бур цахава лавхьхьусса 2 арс ва 1 душ. Хъунама арс КьурбанмахIаммад къуллугъ буллай ур Лакрал ва Ккуллал районнал цачIусса полициялул отделениялий. КIилчинма арс Рамазан дуклай ур Халкьуннал хозяйствалул университетраву. Душ Заира дуклай бур Къизлардай медициналул колледжраву.
ЧIа учинну ХIабибуллагьлун цIуллушиву, гьарца чулинмайсса тIайлабацIуртту!