«Илчи» кказитрал отделданул редактор Зулайхат Тахакьаева гьуртту хьунни Да­гъусттаннал халкьуннал Цашиврул кьинилун хас бувну Дагъус­ттаннал Жагьилтурал министерствалул итабавкьусса «Фото в национальных костюмах» тIисса интернет флешмобрай.

Facеbook ва Instagram соцсетирдайсса цила аккаунтирттай Зулайхатлул дирхьунни миллатрал лаххиялувусса ва варакъущалсса сурат.
Флешмобрал лагрулий дагъу­ттанлувтуран багьлай бия соцсетирдал цала лажинтирттай дишин миллатрал лаххиялувусса суратру, вай хештегругу кIицI лавгун: #МыЕдины #Дагестан #ДеньЕдинстваДагестана #Россия
«Варакъигу ниттилли, лачакгу ниттил буттукьравассар. Вай эмаратсса тIутIивгу ниттилли щаршсса. Ва лачакгу жул кулпатрал реликвияр, жу никирая никирайн тапшур дуллантIисса. Жул ужагърай личIан аьркинссар, лавгмуния­сса аьпа буручлай, жула нитти­хъал захIмат ххирашиврул ва гьунарданул кьадру буручлачисса ­аьдат. Бу­сса оьрмулий икрамрай бура, буххаву цирив къакIулну, къурувгу, ичIаллил давурттайгу зий, ужагъралсса ва оьрчIалссагу бувну, канил давуртту дансса хIалгу, чIунгу диял хъанай диркIсса зунттал хъаннил яхIлийн. Ттул дуссарагу хъус вана ва лачакри. Буну тIий ваниву ниттил захIматгу, каруннил гъилишивугу, ччавугу, дуаьрттугу! Яла-ялагу, чуру бахIлахIиссаксса ва тIутIив щашлашиссаксса хIаллай дирхьусса ниттил щала дакI! Ппай тIий бура вил караматсса каруннайн, дадай! ДакI дарцIуну бура ва лачакрал кьимат гьантта бувккуну лахъ хъанантIишиврийн, ванил магьирлугърал произведениялул кIану бугьантIишиврийн. Яданнав ина Заннал!» — укун чивчуну бур Зулайхатлул соцсетирдайсса цила суратрал лув.

Аминат АхIмадова