Августрал 8-нний МахIач­къалалив бусравну, ваца хъуннасса байран кунна, дунни Физкультурникнал кьини – шагьрулул площадирттай ва лагмасса поселокирттай тIиртIунни хъуннасса фестиваль «Единство в спорте». Му хас дурну дия Щалагу Аьрасатнал Физкультурникнал кьинилун ва Аьрасатнал Халкьуннал цашиврул кьинилун.

Байран сакин дурну дия МахIачкъалаллал администрациялул, ДР-лул Спортрал министерствалул кабакьулийну. Фестиваль дуллай бия шагьрулул дязаннивми площадирттай.Тамашалийн бувкIун бия азарахъул инсантал. Байран дайдирхьунни кIюрххил ссят 7-нний шагьрулул пляжрай, тикку дунни чIявусса инсантал гьурттусса чемпионнащалсса зарядкагу.
БавтIминнал хьхьичI аьла-ссаламрал махъру лавхъунни МахIачкъалаллал бакIчи Жамбулат Салавовлул, ДР-лул спортрал министр Сажид Сажидовлул, ДР-лул Парламентрал жагьилтурал, спортрал ва туризмалул иширттал комитетрал председатель Мурат Пайзуллаевлул. Мероприятиялий гьуртту хьунни мукунма шагьрулул Депутатътурал собраниялул председатель Хиби Аьлиев, мукунма цIа дурксса спортсментал, муниципал спортшколардал директортал, тренертал ва миннал тарбия буллалими, журналистътал ва цаймигу.
КIюрххилсса программалул лагрулий шагьрулул пляжрай шадлугърал тагьарданий дуллунни наградартту. ДР-лул Спортрал министерствалул хIурматрал грамотартту ва барчаллагьрал чагъарду, мукунма МахIачкъалаллал администрациялул хIурматрал грамотартту дуллунни хьхьичIунсса спортсментуран, тренертуран, спортшколардал преподавательтуран, МахIачкъалаллал школардал физкультуралул учительтуран.
КIюрххила шагьрулул пляжрай байбивхьунни спортрал бяст-ччаллу: личлай бия чару ва 24 килорал гирарду, гьузуй бия 100 метралул манзилданий, ка дихьлай бия, гира гьаз дуллай бия, лахъишиврий тIанкI дуллай бия, пляжрал волейболданий буклай бия, дия мухIулттащал лачIун буккавуртту, микку гьуртту хьунни Ухссавнил Ккавкказуллал республикарттаясса спортсментал. Гьурттучитуран пулав шавхьуну бия.
Ахттакьун чIумал фестиваль най дия Лениннул цIанийса площадьрай. Микку хIурмат лавайсса хъамалну бия ДР-лул Туризмалул, халкьуннал художествалул сянатирттал министр Эмин Мерданов, МахIачкъалаллал бакIчинал хъиривмур Эмилия Ражабова ва цаймигу.
Циняв бувкIминнан «Герои спорта» тIисса балай увкунни ДР-лул лайкь хьусса артист Денис Федоренкол.
Спортрал байран най дия мукунна МахIачкъалаллал архсса зумакъирагъирттайгу. Перовлул кучалий ФОКОТ-рал базалий хьунни МахIачкъалаллал поселокирттал дянив мини-футболданул турнир, Щамхал поселокрай 49-мур школалий хьунни «ЦIуллусса ник» тIисса фестиваль, августрал 7-9-нний «Оазис» пляжрай хьунни парусрал спортрал чемпионат. Физкультурникнал кьинилул лагрулий «Труд» стадиондалий ДР-лул паччахIлугърал, граждан ва муниципал къуллугъчитурал дянив хьунни «ТIиртIусса спартакиада». Микку ххув хьунни ДР-лул УФНС-лул команда, кIилчинмур кIану бувгьунни МахIачкъалаллал администрациялул командалул, шамилчинмур кIану - ДР-лул Шяраваллил хозяйствалул министерствалул командалул.
Августрал 9-нний МахIач­къалаллал пляжрай хьунни­ жяматийсса ва политикийсса ишккакку МахIаммад ОьмархIажиевлул аьпалул волейболданул турниргу. Турнирданий гьуртту хьунни арамтурал командартту, цинярдагу дия арулла команда. Финалданий ччалли дурккунни МахIачкъалаллал ва Бущихъиял райондалул командартту. Ххув хьунни МахIачкъалаллал команда. Чарвитул медальлу ларсунни Хунзахъиял командалул.
ХI. Аьдилов